Daimiy Tahkim Mahkemesiniñ (Permanent Court of Arbitration) 2018 senesi qural ay (mayıs) 9 künü neşir etilgen resmiy beyanatına binaen, Qırımnıñ işğali ve ilhaq teşebbüsi sebebinden ğayp etilgen yatırım (mülkiyet) boyunca Rusiyege qarşı davada (2015-36 sanlı dava işi) bir sıra ukrain şirketler ğalebe qazandı. Yatırımlarnıñ teşviki ve ekitaraflama qorçalanması boyunca 1998 senesi imzalanğan rusiye-ukrain añlaşması ve 1976 senesi qabul etilgen Halqara ticaret aqqı boyunca BMT komissiyasınıñ tahkim reglamenti (UNCITRAL) esasında 2015 senesi ilk yaz ayı 19 künü on sekiz şirket ve bir şahıs istilâci devletke qarşı tahkim davasını açtılar.

Bu davanıñ davacıları ‘‘Dayris’’ SMŞ (Sıñırlanğan mesüliyetli şirket), ‘‘Dan-Panorama’’ SMŞ, ‘‘Dilayn Ltd’’ SMŞ, ‘‘Everest-Esteyt’’ SMŞ, ‘‘İMME’’ SMŞ, ‘‘Krım Development’’ SMŞ, ‘‘ Niva-Tur’’ SMŞ, ‘‘Privatland’’ SMŞ, ‘‘Privatofis’’ SMŞ, ‘‘Sanatoriy Energetik’’ SMŞ, ‘‘Jisa’’ teleradioşirketi SMŞ, ‘‘KUA Finansovıy vektor’’ SMŞ, ‘‘KUA Finansovıy kapital’’, ‘‘Edelveys-2000’’ ŞŞ (şahsiy şirket), ‘‘Planeta’’ ŞŞ, ‘‘Aerobud’’ YAC (yapıq aktioner cemiyet), ‘‘Fortuna’’ YAC, ‘‘Ubk-Invest’’ YAC ve şahsen Oleksandr Dubilet oldılar.

Davacılar qayd etti ki, Rusiyeniñ areketleri sebebinden olar Qırımdaki ğayrı menkül mülkiyetine yatırım yapmaqtan marum etildi, soñra ise qanuniy saipleri mülkiyetinden tamamen marum qaldı.

2018 senesi qural ay 2 künü tahkim mahkemesiniñ taqımı mesüliyet ve zarar meseleleri boyunca bir ağızdan qararnı (Award on the Merits) qabul etti. Evelki malümatqa köre, davanıñ umumiy qıymeti 140 million AQŞ dollardan ziyadedir. 2015 sesinden başlap RF bu davada iştirak etmekten qaçına edi ve tahkim mahkemesiniñ qararlarını tanımaycağını beyan etti. İstilâci devletniñ böyle nazar noqtası tahkim mahkemesiniñ qararınıñ yerine ketirilüvine tesir etmez.

2015-36 sanlı dava boyunca tavsilâtlı malümat Daimiy Tahkim Mahkemesiniñ saifesindedir: https://pca-cpa.org/en/cases/133/