2018 senesi ilk yaz ayı (iyün) 4 künü Ukraina Prezidentiniñ Qırım MC Temsilciliginiñ hadimleri Qırımdan abituriyentler içün Ukraina aliy oquv yurtlarına ‘‘Qırım-Ukraina’’ leyhası çerçivesinde devlet büceti esabına qolaylaştırılğan kiriş imkanları boyunca V.İ. Vernadskiy adına Tavriya milliy universitetinde keçirilgen ‘‘Qırım-Ukraina’’ haber tedbirinde iştirak ettiler. Teessüf ki, yañı kiriş kampaniyağa azırlıqta ve teşkil etilüvde al-azırda çoq nuqsanlıqlar köz etile, 2017 senesi kiriş kampaniyasınıñ hatalarını tekrarlamamaq kerekmiz, çünki bıltır qırımlılar içün 2500 imtiyazlı yerden tek 204 işletilgen edi.

Temsilcilik bütün aliy oquv yurtlarınıñ reberiyetlerini bu saada areketlerini faalleştirmege, muayyen aliy oquv yurtlarınıñ içtimaiy reklamasını yerleştirmege, qabul komissiyalarnıñ terkibine ve işine mesüliyetli yanaşmağa çağıra. Eminmiz ki, esas qırım milliy universitetiniñ reberiyeti ‘‘Qırım-Ukraina’’ 2018 senesi kiriş kampaniyası çerçivesinde qırımlılarnıñ faal celp etüvni numayış eter.