2018 senesi oraq ayı (iyül) 12 künü Daimiy Temsilci Borıs Babin, Temsilcilikte halqara alâqalar hızmetiniñ yolbaşçısı ve hadimleri Avropa Şurasınıñ Ukraina içün 2018-2021 seneleri Areket planı çerçivesindeki Avropa Şurasınıñ ‘‘Ukrainada memleket içinde köçüv meselesiniñ devamlı çezilüvi’’ leyhası boyunca Közetüv şurasınıñ oturışında iştirak ettiler. Oturışta Avropa Şurası İnsan aqları boyunca mustaqil teşkilâtlar Departamentiniñ Müdir muavini, Avropa Şurasınıñ Ukrainadaki Ofisiniñ Yolbaşçısı, Avropa Şurası Baş kâtibiniñ Ukraina boyunca Mahsus temsilcisi, Vaqtınca işğal etilgen topraqlar ve devlet içinde köçken şahıslar meseleleri boyunca nazirniñ muavini, Ukraina Yuqarı Şurasınıñ insan aqları boyunca vekâletlisiniñ temsilcisi, Avropa Şurası Leyhasınıñ başlıqları ve danışmanları, Milliy makemeciler mektebiniñ, Ukraina Noter odasınıñ, Ukraina Tasil Nazirliginiñ, Ukraina Regional inkişafı Nazirliginiñ ve başqa merkeziy icra akimiyet organlarınıñ, cemaat teşkilâtlarınıñ, ilmiy müessiselerniñ temsilcileri iştirak ettiler.
Leyhanıñ maqsadı – Ukrainada Avropa Şurasınıñ standartlarına binaen memleket içinde köçken şahsılarnıñ, köçürilgen mütehassıslarnıñ, oquv yurtlarnıñ, müessiselerniñ, em de başqa esas ortaqlarnıñ insan aqlarını qorçalav sistemasına ve adliyege irişimge tesir etüv imkânlarını keñişletüvdir. Leyha köçürilgen mütehassıslarnıñ, müessiselerniñ ve oquv yurtlarınıñ imkânlarını keñişletüv; memleket içinde köçüv boyunca normativ-uquqiy bazanı ve adliy ameliyatını mükemmelleştirüv; yerli ve regional seviyede memleket içinde köçken şahıslarnıñ iştirak ve integratsiya imkânlarını keñişletüv kibi üç yönelişte çalışacaqtır.
Oturış devamında Avropa Şurası Leyhasınıñ Yolbaşçısı Ganna Hrıstova arman (avgust) ayı 2018 – arman ayı 2019 içün iş planınıñ esas yönelişlerini ve tedbirlerini taqdim etti. Tedbirniñ iştirakçıları iş panınen tanış olıp, öz tekliflerinen paylaştılar. Borıs Babin öz çıqışında Temsilcilik Avropa Şurasınıñ işbu Leyhasına tolusınen qol tutqanını qayd etip, öz vekâletleri çerçivesinde onıñ yerine ketirilüvine yardım etmege azır olğanını bildirdi. Daimiy Temsilci, vaqtınca işğal etilgen Qırımğa yaqın olğan rayonlarnı da celp etip, Leyhanıñ çerçivelerini Ukrainanıñ cenübine keñişletmege teklif etti. Bundan da ğayrı, Borıs Babin Leyhanıñ trening ve seminarlarına qoşma olaraq Ukraina Devlet migratsiya hızmetiniñ bölüklerini ve Vernadskiy adına Tavriya milliy universitetini davet etmege teklif etti.