2018 senesi berim ayı (sentâbr) 1 künü Ukraina Prezidenti Petro Poroşenko 5-nci kanaldaki ‘‘Randevu’’ teleyayını vaqıtında teleköpür vastasınen vaqtınca işğal etilgen Qırım ve Donbass topraqlarınıñ sakinlerine muracaat etti.

Petro Poroşenko qayd etti ki, Ukraina ve ukrainalılar er kün işğalciniñ basqısı altında bulunğan vatandaşlarını tüşünmekteler. ‘‘Ve Ukraina Arbiy Küçleri Ukrainanıñ serbestliğini çatışuv çizgisinde qorçalağan arada istilâcı Rusiyege basqını arttırmaq maqsat qoyğan diplomatlarnıñ kündelik zametli faaliyeti vaqtınca işğal etilgen topraqlarnıñ avdetini kün künden yaqınlaştıra’’, – dep qayd etti Ukraina Prezidenti.

Petro Poroşenko Qırımnıñ işğali bitken bir iş değen laflarnı kesen-kes red etkenini qayd etti. Tarih aksine ilhaqlar daimiy olmağanını isbat etmekte; Qırım – Ukrainadır, Ukrainanıñ qısımı olmağa devam ete ve etecektir. Ukraina Prezidenti rusiye istilâsı altında bulunğan bütün semetdeşlerimizge muracaat etip, ukrain bayrağınıñ, devlet tuğrasınıñ ve ukrain akimiyetiniñ bütün işğal etilgen topraqlarğa qaytuvı üzerinde er kün çalışqanını bildirdi. ‘‘Men ve bütün Ukraina siziñ ile berabermiz. Biz sizni iç bir vaqıt qaldırmamız. Ve iç bir vaqıt iç bir kimsege bermemiz’’, – dep yekün çekti Ukraina Prezidenti.