‘‘Rusiyeniñ maqsadı – Azaq deñizini de Qırımnı kibi işğal etmektir. Bu halqara uquqnı qaba şekilde bozuv, ve biz bunı qabul etip olamaymız. O yerdeki arbiylerimizni quvetleştirip, daimiy halqara tahkim odasında Rusiyege qarşı dava açamız’’, – dep qayd etti  ‘‘The Washington Post’’ gazetasına bergen intervyusında Prezident Petro Poroşenko.

Devletimizniñ Başlığı Ukrainanıñ Azaq deñizindeki açıq-aydın uquqiy mevamını hatırlattı. ‘‘Ukrainanıñ muim deñiz limanları olğan Mariupol ile Berdânsktan mallarnı ve yolcularnı taşığan gemilerimizni toqtatmağa, ya da olarğa ücüm etmege Rusiyeniñ iç bir aqqı yoq. Rusiye toqtamasa, bizim yekâne vastamız – sanktsıyalardır’’, – dep qayd etti Petro Poroşenko.

Onıñ fikirince, sanktsıyalar Azaq deñizini rusiye tarafından işğal etüv havfını toqtatmaq içün kereklidir. ‘‘Mariupolden ukrain madeniy mahsulatlarnı taşığan gemini bir künge bile toqtatuv biñlerce dollar ziyan ketire’’, dep haber etti Prezident.

Bundan ğayrı, rusiyeliler daimiy şekilde ukrain suvlarında ukrain balıqçılarına ücüm eteler: olarnı yaqalaylar, toqtatalar ve qorqutalar. Prezident qayd etti ki, bu Ukrainağa qarşı alıp barılğan gibrid cenkniñ bir qısmıdır.

‘‘Sanktsıyalar Rusiyeniñ içki mahsulını azlaştıra, Rusiyede yaşayış seviyesini tüşüre ve rusiye parasını ucuzlaştıra. İstilâcı devletniñ ükümeti Rusiyeni muzakere masasında tutqan ve tecavüzini toqtatmağa mecbur etken sanktsıyalar sebebinden pek yüksek fiyat töley’’, – dep ayttı Prezident.