2018 senesi ekim (oktâbr) ayı 23 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ baş mesleatçısı Valeriya Pahomova Ukraina Esap odasınıñ azası Vasıl İvanovıç Nevidomıy ve Ukraina Esap odasınıñ hadimleri ile iş körüşüvini keçirdiler.

Körüşüv esnasında taraflar Ukrainanıñ vaqtınca işğal etilgen Qırım toprağından köçken şahıslarnıñ aq-uquqlarına, serbestliklerine ve qanuniy menfaatlarına riayet etüv içün bücet sermayeden yapılğan masraflarnıñ semereligi, sürgün etilgen şahıslarğa yardım berüv, işbu şahıslarnı mesken ve para yardımı ile temün etüv kibi bir sıra gumanitar meselelerni muzakere ettiler.

Borıs Babin Temsilcilikniñ kündelik faaliyetini tarif etti, vaqtınca işğal etilgen Qırımğa yaqın olğan regionlarda Memuriy hızmet merkezleriniñ donatıluvı, qırımlılarnı mesken ile temin etüv, vaqtınca işğal etilgen topraqlarnıñ sakinlerine qıta Ukrainada memuriy, naqliy, tıbbiy ve tasil hızmetlerini berüv aqqında malümat berdi.

Memleket içinde köçken şahıslar boyunca Yekâne malümat bazasınıñ tolu şekilde çalışmasınen bağlı mesele ve onı çezüv yolları muzakere etildi. Körüşüv esnasında Esap odası 2018 senesi berim (sentâbr) ayı 25 künü qabul etken 24-3 qararına binaen memleket içinde köçken şahıslarğa kira masraflarını tazmin etmek maqsadınen ayırılğan er aylık tölevler işletüvniñ semereligini teşkerüv boyunca Esabattan Temsilcilikniñ faaliyetinde işletilgen ayrı maddeler talil etildi. Körüşüvniñ neticesi olaraq, taraflar işbirlikniñ esas yönelişlerini ve şekilini belgilediler.