2018 senesi boş ay (noyabr) 3 künü Ukraina Prezidenti İstanbulğa resmiy ziyareti esnasında Türkiye Cumhuriyeti Prezidenti Recep Tayip Erdoğan ile körüşti. Ziyaret esnasında Ukraina Prezidenti, Ukraina adından Türkiyege ve onıñ Prezidentine, Rusiyede ve işğal etilgen ukrain topraqlarında tutulğan ukrain siyasiy mabuslarını ve reinelerinı azat etilüvi boyunca ğayretleri içün minnetdarlığını bildirdi.

‘‘Siyasiy mabuslarnı azat etüvde Türkiyeniñ ve şahsen Türkiye Prezidentiniñ yardımına yüksek qıymet kesemiz. Ahtem Çiygoz ile İlmi Umerovnıñ azat etilmeleri içün minnetdarlığımıznı bildiremiz, işğal etilgen Qırımda ve RF topraqlarında qanunsız şekilde tutulğanlar aqqında añlaştıq, siyasiy mabuslarnı azat etüv ceryanını uyğunlaştırmağa devam etecekmiz’’, – dep ayttı İstambuldaki muzakereler neticesınde Türkiye Prezidenti ile umumiy matbuat konferentsiyası devamında Petro Poroşenko.

‘‘Şubesiz ki, ukrain siyasiy mabuslarını azat etüv ile yalıñız men ve Prezident Erdoğan degil de, bütün dünya oğraşa’’, – dep qayd etti Ukraina Prezidenti’’. O, Almaniya Kantsleri Angela Merkelniñ Ukrainağa ziyareti esnasında rusiye apishanelerinde ve işğal etilgen topraqlarda tutulğan ukrainalılarnı azat etüv meselesi de muzakere etilgenini hatırlattı. Prezident, Frenkistanğa ve Finlândiyağa yaqınlardaki ziyareti esnasında da bu meseleni köterecegini bildirdi.

‘‘Şubesiz ki, qolumızdan kelgenini yapacaqmız ve Oleg Sentsov, Suşçenko, Baluh ve başqa siyasiy mabuslar eñ yaqın vaqıtta evlerine qaytacaqlarına inanamız. Ve halqara qol tutuv bu meselede al etici rölüni oynaycaqtır’’, – dep qayd etti devletimizniñ Başlığı Petro Poroşenko.

Ukraina Prezidenti adamlar yalıñız öz eviniñ üstünde asılğan ukrain bayrağı içün apishanege atılğanını, ya da sebepsiz 20 yılğa maküm etilgenini Rusiye başqalarğa añlatmaqta qıynalğanını qayd etti. ‘‘Rusiyege basqını arttırmaq ve em rusiye apishanelerinde oturğan, em de işğal etilgen topraqlarda reineler olaraq tutulğan vatandaşlarımıznıñ azat etilüvi oğrunda ğayretlerimizni birleştiremiz. Küreşimizni devam etecekmiz’’, – dep qayd etti Petro Poroşenko.

Türkiye Cumhuriyeti Prezidenti Recep Tayip Erdoğan, öz nevbette, türk tarafına taqdim etilip, bundan soñra azat etilgen ve Ukrainağa qaytqan eki siyasiy mabus Ahtem Çiygoz ile İlmi Umerov aqqında hatırlattı. ‘‘Bu sefer biz daa uzun cedvelni alıp, onı deral rusiye tarafına taqdim ettik. Bu ceryannı devam ettirip, onıñ çezilüvinde muvafaqiyetler tileyim’’, – dep qayd etti Türkiye Prezidenti.

Ziyaret esnasında Petro Poroşenko Ukraina ile Türkiye dostane, ortaqlıq ve strategik munasebetlerde bulunğanını qayd etti. Ukrainanıñ egemenligine, mustaqilligine ve topraq bütünligine qol tutuv içün de Türkiyege minnetdarlığını bildirdi. ‘‘Türkiye iç bir vaqıt qanunsız Qırım ilhaqını qabul etmeycegi aqqında qandıruvdan memnünmiz, – dep qayd etti Prezident.

Ukraina Prezidenti öz Twitter saifesinde, Azaq deñizindeki ‘‘süyreklengen’’ rusiye istilâsını, Qırımda insan aqlarınıñ bozuluvını Türkiye diqqatsız qaldırmaycaqında qandıruv pek muim olğanını qayd etti. ‘‘Bu meselelerniñ çezilüvi üzerinde beraberlikte ve bu cümleden BMT kibi halqara teşkilâtlarnıñ çerçivesinde çalışmağa azır olğanımıznı tasdıqladıq’’, – dep qayd etti Petro Poroşenko.

Türkiye Prezidenti Recep Tayip Erdoğan öz nevbette, Ukraina Prezidenti ile körüşüviniñ neticesi olaraq, Türkiye iç bir vaqıt Qırımnı qanunsız alda ilhaq etmek  Rusiyeniñ ıntıluvını tanımağanını ve tanımaycağını qayd etti. Recep Tayip Erdoğan Türkiyeniñ mevamı Ukrainanıñ egemenligine, mustaqilligine, topraq bütünligine ve siyasiy birligine qol tutuvdan ibaret olğanında işandırdı. ‘‘Qanunsız Qırım ilhaqını iç bir vaqıt tanımadıq ve tanımamız. Ve em Qırım toprağında yaşamağa devam etken, em de öz toprağından köçmege mecbur olğan qırımtatarlarnıñ aq-uquqlarını ve menfaatlarını qorçalamağa devam etecekmiz’’, – dep qayd etti Türkiye Cumhuriyetiniñ Prezidenti.