Ukraina Prezidenti Petro Poroşenko NATO Baş Kâtibi Yens Stoltenberg, Avropa Şurasınıñ Prezidenti Donald Tusk ve Lehistan Prezidenti Ancey Duda ile telefon vastasınen subetleşti.

Petro Poroşenko Azaq-Qaradeñiz suvlarında Ukrainağa qarşı Rusiyeniñ tecavüziy areketleri ve Ukrainanıñ olarğa cevabı ve bu cümleden arbiy vaziyetni ilân etmege azır olğanı aqqında bildirdi.

Ukrain gemicilerge ve gemilerge qarşı yapılğan bütün areketler ‘‘halqara uquqnı ve Budapeşt memorandumnı qaba şekilde bozuv’’ olaraq adlandırıldı.

Ukrain gemicilernen gemilerniñ deral azat etilüvi maqsadınen Ukraina devletiniñ Başlığı Rusiyege halqara basqını quvetleştirmege çağırdı.

NATO Baş Kâtibi Ukrainanıñ topraq bütünligine ve mustaqilligine qol tutuvını bildirip, Rusiyeni Azaq ile Qara deñizleriniñ suvlarında halqara uquqqa ve gemicilik serbestligine riayet etmege çağırdı. Poroşenko ile Stoltenberg Rusiye tecavüzi sebebinden Ukraina-NATO Komissiyasınıñ fevqulâde oturışını acele sürette teşkil etmege añlaştılar.

Donald Tusk Rusiyeniñ tecavüziy areketleri ve vaziyetniñ kerginleşüvi munasebetinen raatsızlığını ve Ukrainağa tolusınen qol tutqanını bildirdi.

Lehistan Prezidenti Ukrainağa ve onıñ areketlerine qol tutuvını bildirdi. Poroşenko ve Duda Avropa Birligini Rusiyege sanktsion basqını quvetleştirmege ve bu meseleni Avropa Şurasınıñ toplaşuvında muzakere etmege çağırdılar.

Rusiye telükesi sebebinden taraflar nevbetteki adımlarını uyğunlaştırdılar ve eñ yüksek seviyede alâqada bulunmağa añlaştılar.