Prezident Petro Poroşenko Avropa Birligi Qara deñiziniñ umumiy suvlarında tecavüz yapqan, Misk añlaşmalarını yerine ketirmegen, Ukrainanıñ işğal etilgen topraqlarında qanunsız saylavlar keçirgen, halqara uquqnı tolusınen körmemezlikke urğan ve devletimizge qarşı istilâ etken Rusiyege qarşı sanktsiyalarnı devam eteceginde emindir. Bu aqta Petro Poroşenko Brüsselde NATO Baş kâtibi Yens Stoltenberg ile umumiy matbuat konferentsiyası devamında bildirldi.

Ukraina devletiniñ Başlığı Avropa Şurasınıñ Prezidenti Donald Tuskka tecavüzde iştirak etken Rusiye gemileriniñ ve vatandaşlarınıñ cedvelini taqdim etkenini hatırlattı. ”Muzakere etilgen muayyen sanktsiyalar boyunca – tünevin Avropa Şurasına, Avropa Komissiyasına, Prezident Tuskka, bügün ise Baş kâtipke ukrain gemilerine Qara deñizde piratlar kibi ücüm etken rusiye arbiyleriniñ, Federal Havfsızlıq Hızmeti hadimleriniñ soyadlarını taqdim ettim”, – dep qayd etti o. ”Olarnıñ arasında FHH zabitleri ve ukrain arbiylerini apiske atmağa tırışqan prokurorlar, taqiqatçılar, mahkemeciler bardır”, – dep qoştı Prezident. ”Bunı bir kere daa qayd etmege isteyim, arbiylerimiz – cenk esirleridir. 24 ukrain arbiyge Rusiyeniñ iç bir türlü aqqı yoq. Bunı Jeneva konventsiyası tasdıqlay”, – dep qayd etti Petro Poroşenko.

Onıñ aytqanlarına köre, qanunsız Qırım işğali munasebeti ile, Şarqta devletimizge qarşı qanunsız tecavüz munasebeti ile ve Qara deñiziniñ umumiy suvlarında nevbetteki tecavüziy areketler munasebeti ile Rusiye Ukrainağa qarşı tecavüzci olğanını körmemezlikke urmağa devam ete. Prezident, Rusiyege qarşı sanksiyalar meselesi boyunca avropa idarelerinde muayyen muzakereler keçirilgenini qayd etti. ”Tünevin Donald Tusk yolbaşçılığında Avropa Şurasınıñ vekilleri ile pek muvafaqiyetli körüşüvler keçirdik ve Rusiye Federatsiyasına qarşı sanktsiyalar bügün devam etileceginde eminmiz”, – dep qayd etti Petro Poroşenko.

NATO Baş kâtibi Yens Stoltenberg öz nevbette Ukraina Prezidenti ile muzakereler devamında Ukrainağa yardım ve Rusiyeniñ Qara deñizde tecavüziy areketleri semereli şekilde muzakere etilgenini qayd etti. ”Azaq deñizinde ve etraftaki suvlarda vaziyetniñ kerginleşüvinen pek raatsızlanamız. Ukrain gemilerinen gemicilerine Rusiye yapqan ücümni iç bir şekilde aqlamağa mümkün degil”, – dep qayd etti o. ”Rusiyeni bütün gemicilerni ve gemilerni deral azat etmege, gemicilik serbestligini ve bu cümleden Azaq deñizindeki ukrain limanlarına serbest irişimni temin etmege çağıramız. Qırımnı işğal etken Rusiyeni qattı şekilde takbih etemiz. Biz bu işğalni tanımaymız ve tanımaycaqmız. Keriç boğazınıñ quruluvı – Ukrainanıñ egemenligine ve topraq bütünligine qarşı daa bir cinayettir”, – dep qayd etti Yens Stoltenberg. Alyansnıñ Baş kâtibi Ukraina Prezidentine Ukrainanıñ mevamı ve Keriç boğazında rusiye arbiyleriniñ ukrain gemilerine ücümi esnasında ukrain arbiylerniñ halqara uquq çerçivesindeki areketleri içün minnetdarlığını bildirdi. ”Poroşenko bey, Ukraina Azaq deñizindeki vaqialar devamında numayış etken metanetke pek yüksek qıymet kesem. Vaziyetniñ kerginleşüvi iç kimsege fayda ketirmez”, – dep qayd etti o.