2019 senesi qara qış (yanvar) ayı 18 künü Herson vilâyetindeki Geniçesk rayonınıñ Novooleksiyivka qasabasında Memuriy hızmet merkeziniñ tantanalı açıluvı olıp keçti. Memuriy hızmet merkezi Ukraina vatandaşları ve bu cümleden Ukrainanıñ vaqtınca işğal etilgen Qırımnıñ sakinleri içün berilgen memuriy hızmetlerniñ keyfiyetini kötermek maqsadınen Novooleksiyivka qasaba şurası, Ukraina Prezidentiniñ Qırım Muhtar Cumhuriyetindeki Temsilciligi ve ”Strategik araştıruvlar boyunca Qırım institutı” (Kıyiv) cemaat teşkilâtı arasında işbirlik ve qol tutuv aqqında Memorandum esasında ve Ukrainada Çehiya Cumhuriyeti Elçihanesiniñ maddiy yardımı ile teşkil etildi.

Merkezniñ açıluvında Ukrainada Çehiya Cumhuriyeti Elçihanesiniñ vekilleri, Qırımtatar halqınıñ meseleleri boyunca Ukraina Prezidentiniñ Vekâletlisi Mustafa Cemilev, Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov, vilâyet ve rayon akimiyetleriniñ resmiy vekilleri, yerli cemaat ve matbuat vastaları iştirak ettiler.