Ukraina Prezidenti Petro Poroşenko ”Ukraina” televizion kanalına bergen intervyüda, Ukraina, ukrain akimiyeti ve Prezident içün devletniñ topraq bütünligini, mustaqilligini ve egemenligini ğayrdan tiklevden daa muim vazife olmağanını qayd etti. ”Bizim birinci vazifemiz – bizge qarşı kim olğanını añlamaqtır. Bu, dünyanıñ eñ büyük arbiy maşnalardan biri, Qırımnı qanunsız şekilde ilhaq etmege niyetlengen totalitar devlettir. Ve Qırımnıñ işğalden azat etilüvine hızmet etken birinci adımlarımız, Ukraina ile dünyeviy birdemlikni meydanğa ketirüvdir”, – dep hatırlattı devletimizniñ Başlığı.
”Ekinci beyanatımız – Ukraina iç bir türlü bazarlıqqa ve ayın-oyunlarğa razı olmaz. Ve Qırım Ukrainağa qaytarılıcaqtır. Biz bunıñ eñ yaqın vaqıtta yüz bermesi içün qolumızdan kelgenini prezident saylavlarından soñ yapmağa başlarmız. Bu mesele prezident saylavlardan evel çezilmeycegini Putinden defalarca eşitken ediñiz, çünki o, Poroşenko degil de, başqa birisi saylanacağını, yañı ukrain akimiyeti tizlerinde süyrelip kelecegini ve oña Qırımnı bağışlaycağını ümüt ete. Menim cevabım – nafile bekley. Biz Qırımnı azat etermiz”, – dep qoştı o.
Prezident, Ukraina bunıñ içün öz arbiy küçlerini arttırğanını, halqara birdemlikni quvetleştirgenini, iqtisadiy inkişafnı temin etkenini qayd etti.
”Donbas meselesi de bu şekilde çezilecek. Saylavlardan soñ mavı kaskalar (Donbasnıñ işğal etilgen topraqlarında BMT altında barışıq missiyanı meydanğa ketirüv – muarririyetten) ilerime olacağını tahmin etem”, – dep qoştı devletimizniñ Başlığı.
”Şunı da qayd etmege isteyim ki, AHİT nezaret etici missiyanıñ vekâletleri yalıñız Donbasqa degil, Qırımğa da üküm süre. Ve er afta neler yapılacağına dayir pek aydın planımız bar”, – dep qayd etti Petro Poroşenko.
Prezident Qırımtatar Milliy Meclisine de öz minnetdarlığını bildirdi. ”Ayrıca olarğa muracaat etmege isteyim – Qırımnı azat etmek içün küreşecegimizge inanıñız. Biz iç bir künge bile siziñ aqqıñızda unutmaymız. Ve biz küreşiñiznen ğururlanamız. Beraberlikte mıtlaqa ğalebe qazanırmız”, – dep ayttı devletimizniñ Başlığı.