Qırımtatar halqınıñ öz tarihiy vatanından sovet rejimi tarafından sürgün etilmesiniñ 75 yıldönümine bağışlanıp Kyıv şeerinde keçirilgen tedbirlerde Ukraina Prezidenti Petro Poroşenko, Ükümet azaları, Ukraina Yuqarı şurası deputatları, çetel diplomatları, Qırımtatar Milliy Meclis azaları, Ukraina Prezidentiniñ Qırım MC Daimiy Temsilciniñ Birinci muavini İzet Gdanov, cemaat vekilleri iştirak ete.

Ukraina Prezidenti Petro Poroşenko rekviyem vaqıtında qırımtatarlar al-azırda Qırımda 75 yıl evelsi sovet vaqıtında kibi taqip ve cezalavlarğa oğrağanını qayd etti.

”Qırım mıtlaqa Ukrainağa qaytarılmalı, Qırım yarımadasında ukrain egemenligi ğayrıdan tiklenmeli. Böyle olacağına iç de şübem yoq, em de bir daqqağa bile peyda olmağan edi. Bu, mıtlaqa olacaq şeydir, – dep qayd etti Petro Poroşenko ve bütün qırımtatarlarğa cesürlikleri ve birlikleri içün minnetdarlığını bildirdi.

Bundan da ğayrı, Ukraina Prezidenti Ukrainanıñ tamır halqı olğan qırımtatarlarnıñ mustaqil Ukraina devletiniñ çerçivesinde özüni belgilev aqqını qanuniy seviyede pekitmek kerek olğanını qayd etti.

Devletimizniñ Başlığı, bügünde-bügün ukrain akimiyeti Rusiye istilâsına qarşı küreşte Ukrainağa kösterilgen halqara qol tutuvnı saqlamaq, bütün Kreml reineleriniñ azat etilmesi içün Rusiyege sanktsion basqını arttırmaq kerek olğanını hatırlattı.

Qırımtatar Milliy Meclis reisi Refat Çubarov öz çıqışında qırımtatarlarğa daimiy şekilde qol tutqan ve Rusiye istilâsına ve Qırımnıñ işğal etilmesine qarşı halqara basqını arttırmağa çağırğan Petro Poroşenkoğa minnetdarlıq sözlerini bildirdi.

Refat Çubarov, Latviya Seymi keçenlerde sürgünlik vaqiasını qırımtatar halqına qarşı soyqırım olaraq tanığanını, «Qırımdaki sovet ve rusiye cezalavlarına nisbeten tarihiy ve siyasiy adalet tiklenmesiniñ başlanuvı» olaraq adlandırdı.