2019 senesi qural ay (mayıs) 24 künü Mıstetskiy Arsenaldaki ”Kitap Arsenalı” IX Halqara festivali çerçivesinde Qırım aq-uquq qorçalayıcıları ”Qorqu yarımadası: Qırımdaki serbestsizlikniñ 5-yıllığı” kitabını taqdim ettiler, tedbirge Temsilcilikniñ Kıyivteki ofisiniñ hadimleri de qoşuldı.

Kitapta Qırımnıñ Rusiye arbiyleri ve mahsus hızmetleri tarafından zapt etilüvi aqqındaki deliller bir tertipke ketirilip, işğalniñ 5 yılı devamında yarımadada insan aqları saasında esas bozuluvlar talil etildi.

Kitapnıñ esas qısımı Rusiyeniñ Qırımdaki areketlerine halqara-uquqiy qıymet kesken muim vesiqalardan, Ukraina topraqlarınıñ qısmen zapt etilüvi neticesinde qabul etilgen Ukraina normativ-uquqiy senetlerden, işğal etilgen Qırımğa öz qanuniyetini amelge keçirgen Rusiye akimiyetiniñ normativ-uquqiy senetlerinden, Qırımnıñ Rusiye tarafından işğal etilüvine hızmet etken sözde ”Qırım akimiyetiniñ” senetlerinden ibarettir.

Bundan da ğayrı, festival devamında İrına Vırtosunıñ ”Qırım albomı: aq-uquq qorçalayıcılarnıñ ikâyeleri” kitabı taqdim etildi, işbu kitaptaki yigirmi şahşiy ikâyede evlerini ğayıp etseler de, Qırımda insan aqlarınıñ qorçalanması içün küreşlerini devam ettirgen, ya da işğalde qalıp, cezalavlarğa qarşılıq köstergen adamlarnıñ keçmişi, bügüni ve kelecegi tasvir etilmektedir.