2019 senesi (qural ay) mayıs 29 künü Kıyiv şeerinde Ukraina Prezidentniñ Qırım MC Temsilciliginiñ, vaqtınca işğal etilgen topraqlar boyunca Ukraina Nazirliginiñ, Ukraina çetel işler Nazirliginiñ, Qırım MC Savcılığınıñ memurları ve medeniy asabalıq ile atiqiyat saasında mütehassıslar, Ukrain medeniy fondunıñ qol tutuvı ile «”Ukrain evi” iş ve medeniy işbirlik boyunca Qırım merkezi» Cemaat birligi teşkil etken ”Qırım abideleri – Ukraina medeniy asabalığınıñ zemaneviy vaziyeti” mevzusında tögerek masada iştirak etiler.

Tedbir iştirakçileri Qırım MC ve Aqyar şeeriniñ topraqlarında işğalniñ 5 yılı devamında bir çoq atiqiy, tarihiy ve medeniy abidelerge tüzetilmez zarar ketirgen, Ukraina müzey fonduna ait olğan yadikârlıqlarnı Qırımdan RF topraqlarına qanunsız alda köçürgen Rusiye akimiyetiniñ areketlerini aydınlattılar.

Temsilcilikteki halqara alâqalar hızmetiniñ reisi Yevgen Samuha öz çıqışında işğalciler UNESCO dünya asabaliğına kirsetilgen ”Hersones-Tavriyskiy” müzey-qoruğını Rusiye ortodoks kilisesiniñ diniy müessisesine ve Kreml yöneticileri içün eglence meydançığına çevirgenini tarif etti.

Bundan da ğayrı, bozucılarğa qarşı qabul etilgen milliy ve halqara sanktsiyalarnıñ semereligi, olarnı cinaiy mesüliyetke çekmek imkâniyeti, arbiy dava şaraitlerinde medeniy yadikârlıqlarnı qorçalav aqqında Gaaga konventsiyasınıñ ekinci protokolına Ukraina içün qoşulmaq zarureti ve eñ yaqın vaqıtta Qırım içün UNESCO mahsus missiyasını teşkil etmek kerekligi muzakere etildi.