Ukraina prezidenti Volodımır Zelenskiy qayd ete ki, Ukrainada barışıqnı ğayrıdan tiklev onıñ içün yerine ketirilmesini talap etken esas vazifelerden biridir. Bu sebepten tınçlıq meselesi Frenkistan prezidenti Emmanuel Makron ile bügünki semereli körüşüvinde esas yer aldı.

”İlk-evelâ Ukrainağa barışıqnı qaytaruv aqqında söz yürsetildi. Bu menim ilk nevbetteki vazifemdir. Em insan, em de prezident olaraq böyle tüşünem. Bu fikir ile men er kün yuqlamağa yatam ve uyanam”, – dep qayd etti jurmalistler ile sübetinde Volodımır Zelenskiy.

”Eminim ki, Rusiye halqara uquqnu körmemezlikke urğan arada, Avropa özüni havfsızlıqta is etip olamaz. Frenkistan ve başqa halqara ortaqlarımız er bir ukrainalını raatsızlağan meseleni bileler. Ukrainanıñ ateşleyicisi Qırım ile Donbaş olğan barot çapçağına çevirilmesini iç kimse istemey”, – dep qoştı o.

Volodımır Zelenskiy qayd etti ki, onı prezident olaraq saylağan ukrain halqı Minsk muzakereler ceryanında oña qarar qıdıruvnı emanet etti. ”Cenkni bitirüv ve ilhaq etilgen ukrain topraqlarnı qaytaruv – menim esas vazifem”, – dep qayd etti o.

”Devletniñ başlığı Frenkistan prezidenti ile bügünki körüşüvinde bu maqsadqa ketire bilecek nevbetteki adımlar aqqında añlaşqanını haber etti.

”Normand formatı çerçivesinde işbirlikni yañılamaq kerek olğanı aqqında añlaştıq. Tışqı siyaset boyunca mesleatçılarımız eñ yaqın vaqıtta körüşip, nevbetteki liderler körüşüvini azırlarlar. Bu, esas meseledir”, – dep haber etti prezident.

Donbasta al-azırda beş yıl devam etken davağa ve vaziyetni çezüvge kelgende ise, Emmanuel Makron, Volodımır Zelenskiyniñ ”tınçlıqnı ğayrıdan tiklemek, silânı sustırmaq ve muzakereler yoluna çıqmaq” kibi tekliflerine qol tuttı.

”Ukrainağa tınçlıqnı qaytarmaq içün, biz kene Minsk formatına qaytmağa isteymiz. Emin oluñız ki, prezident efendi, bu niyetiñizde ve Rusiye ile dialogıñızda sizge qol tutmağa azırım”, – dep ayttı Frenkistan Cumhuriyetiniñ prezidenti.

”Vaqıtı kelgende, mecburiyetlerniñ yerine ketirilmesi içün, Frenkistan Normand formatında toplaşuvnı keçirmege azırdır. Amma o vaqıtqace eñ yaqın kelecekte bu mecburiyetlerniñ (Minsk añlaşmalarınıñ – muarririyetten) yerine ketirilmesini tasdıqlağan bir-de-bir adımlarğa, işmarlarğa muhtacmız”, – dep qoştı Emmanuel Makron.

Menba: https://www.president.gov.ua/news/volodimir-zelenskij-povernennya-miru-v-ukrayinu-ce-mij-prior-55937