Vaqtınca işğal etilgen Qırım Muhtar Cumhuriyeti ve Aqyar şeeri ile memuriy sıñırdaki kiriş-çıqış nezaret noqtalarınıñ faaliyeti 2020 senesi çiçek (aprel) ayı 3 kününe qadar vaqtınca toqtatıldı.

Böyle qararnı Ukraina Nazirler Şurası Ukraina topraqlarında SARS-CoV-2 koronavirus sebebinden yüz bergen COVİD-19 keskin respirator virus hastalığınıñ darqaluvına qarşılıq kösterüv maqsadınen qabul etti (UNŞ 2020 senesi saban ayı 14 künü qabul etken 291-р sanlı qarar https://cutt.ly/UtjYcD3).

KÇNN-lar aşağıdaki şahıslarnı qabul eteceklerine diqqatıñıznı celp etemiz:

– VAQTINCA İŞĞAL ETİLGEN TOPRAQLARĞA Qırım Muhtar Cumhuriyetinde ya da Aqyar şeerinde resmiy şekilde qayd etilip yaşağan vatandaşlar ve olarnıñ qoranta azaları, naqliyat vastaları, yükleri ve başqa mülkiyetleri;

– VAQTINCA İŞĞAL ETİLGEN TOPRAQLARDAN Qırım Muhtar Cumhuriyetiniñ ya da Aqyar şeeriniñ tışında  resmiy şekilde qayd etilip yaşağan Ukraina vatandaşları, olarnıñ naqliyat vastaları, yükleri ve başqa mülkiyetleri.

Bundan ğayrı, milliy menfaatımıznı qorçalamaq, ya da halqara mecburiyetlerini eda etmek maqsadınen vaqtınca işğal etilgen Qırım Muhtar Cumhuriyetinden ve Aqyar şeerinden çıqıp ketken şahıslarnı, diplomatik müessiselerniñ ve gumanitar missiyalarnıñ vekilleri, olarnıñ naqliyat vastaları, yükleri ve başqa mülkiyetleri de KÇNN-dan keçe bilecek.

Vaqtınca işğal etilgen Qırım Muhtar Cumhuriyetinden ve Aqyar şeerinden ketmege niyetlengen diger yabancılar, vatandaşlıqları olmağan şahıslar öz seyaatlarını Vaqtınca işğal etilgen topraqlarnı ğayrıdan integratsiya etüv meseleleri boyunca nazirlik ile uyğunlaştırmalılar.