Qırım MC ile memuriy sıñırda kiriş-çıqış nezaret etüv noqtaları (KÇNN) açılğan soñ, Ukraina akimiyetiniñ nezareti altında bulunğan topraqlarğa keçken şahıs 14 kün devamında ”Evde areket et” cep ilâvesi vastasınen özüni etraf müitten ayırmalı. Aks alda memuriy sıñırdan keçiş yasaq etile bile.
COVID-19 içün PLR-testini tapşırıp, neticelerini cemaat sağlığı Merkezine yollamalarını rica etseñiz, ”Evde areket et” cep ilâvesi vastasınen özüñizni etraf müitten ayıruvnı 14-künlük müddetten evel toqtatmaq mümkün olacaq.
Laboratoriyadan kelgen test neticesi menfiy ise, özüni etraf müitten ayıruvnı toqtatmaq mümkün.
Laboratoriyalar cedveli https://www.phc.org.ua/news/algoritm-pripinennya-samoizolyacii-dlya-osib-scho-peretnuli-derzhavniy-kordon
2020 senesi ilk yaz ayınıñ 30-da Ukraina sağlıq saqlav Naziri Maksım Stepanovnıñ ”Şahıslarnıñ COVİD-19 içün test etilmeleriniñ nezaretini teşkil etüvge dair” 41 sanlı avalesinde aşağıdaki tertip belgilendi:
- PLR-talilini yapqan müessise, sahısnıñ talabına binaen, menfiy netice aqqında Ukraina cemaat sağlığı merkezine haber ete.
- Ukraina cemaat sağlığı merkezi malümatlarnı umumiy elektron sistemasına toplay ve Ukraina dijital deñişüv Nazirligini içün irişim aça.
- Ukraina dijital deñişüv Nazirligi ”Evde areket et” elektron hızmetine özüni etraf müitten ayıruv ve nezaret etüv toqtatılğanı aqqında malümat kirsete.
Amma laboratoriyadan neticeler CSM-ne kelmese, ya da ilâve kerek olğanı kibi çalışmasa, malümatlarnı teşkermekte ve test neticelerini özüñizni etraf müitten ayıruvnıñ 14-künlük müddeti bitkence saqlamaqta bir fayda bar olğanını hatırlañız.
Hatırlatamız ki, ”Evde areket et” cep ilâvesiniñ mevcutlığı yaşı 14-ten ziyade olğan şahıslarda mıtlaqa teşkerile, qalğanlarda onıñ olması şart degil. Amma bir qaç kişi beraberlikte ketkende (meselâ ömür arqadaşları), ”Evde areket et” ilâvesini ekisi de ayrı-ayrı yüklemeli.
İlâveni KÇNN-nı keçken arada pasport nezareti noqtasındaki haber plakatından QR-kodnı skan etip yüklemege mümkün, amma biz sizge evelden azırlıq körip, ilâveni seyahattan aldın telefonğa yüklep, KÇNN-nı keçkende çalıştırmağa tevsiye etemiz.
Bunı yapıp yetiştirmegen olsañız, eyecanlanmañız, KÇNN-da “UkraineLovesYou” bedava Wi-Fi ağı çalışmaqtadır.
”Evde areket et” ilâvesini bu yerden yüklemege mümkün:
”Evde areket et” ilâvesini amelge keçirmek içün nevbetteki 14 kün devamında çalışacaq ukrain cep telefonı nomerasını yazmalısıñız. Şu telefon nomerasına kelgen mesajnı ilâvede qayd etmek kereksiñiz.
Yanıñızda tek çetel telefon nomerası bar ise, biraz qıyınca olacaq, böyle alda siz:
- pasportıñıznı köstermelisiñiz;
- telefonda al azırda çetel nomerañıznıñ sim-kartı olğanını köstermelisiñiz);
- ”Evde areket et” ilâvesiniñ telefon nomerası yazılacaq kiriş saifesini açıp, ekranda kösteriñiz;
- nevbetteki 14 kün devamına çalışacaq ve ”Evde areket et” ilâvesi içün işletilecek telefon nomerañıznı ve bulunacaq adresiñizni Devlet sıñır hızmetiniñ haber sistemasında qayd etilmesi içün yazdırıñız.
İlâveni yüklegen soñ, oña puş-mesajlarnı yollamağa ruhset etiñiz ve bulunacaq adresiñizni yazıñız.
DİQQAT! Şimdi bulunğan yeriñizni degil de, bulunacaq yeriñizni qayd etmelisiñiz.
Bundan soñ ilâvede ”Siz izolâtsiya ya da observatsiya yerinde bulunasıñızmı?” degen yazı peyda olacaq. Bu pencereni Devlet sıñır hızmetiniñ temsilcisine köstermelisiñiz. Özüñizni etraf müitten ayıracaq yerge kelgeniñizni tek bulunacaq yeriñizge kerçeken de kelgen soñ qayd etmelisiñiz ve etalon resimiñizni yollamalısıñız, çünki bu vaqıtta kerçekten bulunğan yeriñiz de qayd etile. Ve o, ilâvede yazılğan adres ile aynı olmalı.
Etalon resimiñizni yapqan soñ, karantinniñ soñuna qadar qalqan künlerni esaplağan ilâveniñ esas ekranı açılır. Esap 14-nci kününden başlana. Özüñizni etraf müitten ayıruvnıñ soñki künü sayıcı ”0 kün izolâtsiya ya da observatsiya qaldı” degen yazını kösterecek. Özüñizni etraf müitten ayıruv müddeti bitken soñ, sayıcı yerine ”izolâtsiya ya da observatsiya müddeti bitti” degen yazı peyda olacaq.
Ukraina Prezidentiniñ Qırımdaki Temsilciligine aşağıdaki alâqa vastalarınen muracaat ete bilgeniñizni hatırlatamız:
- bedava ”sıcaq ağ” 0 800 502 192 telefonı ve (0552)49-59-39 nomeralı telefon vastasınen;
- Skype ağı vastasınen – esap: ark predstavnictvo;
- [email protected] elektron menzili vastasınen;
- vatandaşlarnıñ muracaatları içün poçta adresimiz: Herson şeeri, Uşakov caddesi, 42.
#UkrainaSizniSeve #PPUgovUA #QırımUkrainadır
Malümatnı azırlamaq içün Ukraina Nazirler Şurası, Dijital Nazirlik haberleri işletildi