Böyle sıñırlamalarnı Rusiye Federatsiyasınıñ Ükümeti 2020 senesi saban (mart) ayı 27 künü 763-p sanlı qararı ile qabul etti, işğalci memuriyetler ise olarnı qanunsız alda Qırım MC ve Aqyar şeerine darqattı.
”Sıñırlayıcı tedbirlerni COVİD-19 tacmaraz pandemiyası ile aqlamağa tırışsalar da, olar cemaat sağlığını qorçalamağa iç de yardım etmeyler. İşğalci tarafından berilgen ve Qırım MC ile Aqyar şeerine darqatılğan bir de bir vesiqa qanunsız olğanını daimiy şekilde hatırlatamız, çünki bu topraqlar 2014 senesi kiçik aynıñ 20-den berli işğal etilgen olsa da, Ukrainanıñ ayırılmaz parçası olaraq, Ukraina Esas qanunına ve Ukraina qanunlarına boyusunmalılar. Asılında yerli ealini Qırımdan tamamen quvmağa, vaqınca işğal etilgen Qırım ile qıtaiy Ukraina arasındaki bağlarnı üzmeğe niyetlengen Rusiye Federatsiyası, sağlıq saqlav tedbirlerini bir manaçıq olaraq qullana. Qırımda yaşağan ve Ukraina vatandaşı pasportı, em de işğalci akimiyet aldırtqan Rusiye vesiqası olğan insan Herson vilâyeti ile memuriy sıñırnı tek bir kere keçe bile. Bu sebepten vaqtınca işğal etilgen Qırımda yaşağan vatandaşlarımız (bank hızmetleri, pasportlarnı, doğuv aqqında şeadetnamelerini resmiyleştirüv kibi) bir sıra memuriy ve başqa hızmetlerni alamaylar, soy-sopunı ve yaqınlarını ziyaret etip olamaylar, planlaştırılğan tıbbiy ameliyatlarnı yaptıramaylar. Şunı da qayd etmek kerek ki, bu sıñırlamalar 2020 senesi kiriş kampaniyası devirinde de üküm süre. Bu sebepten abituriyentler ve olarnıñ ana-babaları Temsilcilikke muracaat etip, yardım soraylar, çünki olarnıñ bir qısımı endi kiriş imtianlarını tapşırıp, bir aydan Ukraina aliy oquv yurtlarına oqumağa ketecek edi, bazıları ise istegen universitetni seçip, kiriş imtianlarına azırlanmaqta. Rusiye ise öz areketlerinen olarnıñ kelecegini yoq etmektedir. Rusiye Federatsiyası Qırımda yaşağan adamlar içün yarımadanı çıqışı olmağan bir apishanege çevire,” – dep izaatlay vaziyetni Ukraina Prezidentiniñ Qırım MC-deki Daimiy Temsilcisi Anton Korınevıç
Ukraina Prezidentiniñ Qırım MC-deki Temsilciligi Ukraina Prezidenti Ofisi, Ukraina çetel işler Nazirligi, diplomatik müessiseler ve halqara teşkilâtlar ile bağ tutıp, bu meseleni çezmege tırışa. Ukrainanıñ vaqtınca işğal etilgen topraqlarını ğayrıdan integratsiya etüv meseleleri boyunca Nazirlik ve Ukraina tasil ve ilim Nazirligi areketleri sıñırlanğan abituriyentler içün çareler qıdıra ve bu cümleden uzaqtan (onlayn şekilde) vesiqalarnı tapşıruv imkâniyeti üzerinde çalışa.
Vaqtınca işğal etilgen topraqlar ve individual şekilde memuriy sıñırnı keçüv aqqında sualleriñiznen Temsilcilikke muracaat ete bilesiñiz:
- vatandaşlarnıñ muracaatları içün poçta adresi: Herson şeeri, Uşakov caddesi, 42;
- bedava ”sıcaq ağ” telefonı: 0 800 502 192;
- Skype ağı vastasınen – esap: ark predstavnictvo;
- elektron menzili vastasınen: [email protected]