Sanktsiyalarnıñ uzatılması ve quvetleştirilmesi, Rusiye Federatsiyasınıñ cinayetleri boyunca davalarnıñ halqara mahkemelerde baqılması, başqa devletlerniñ parlamentlerinde ve ükümetlerinde muzakere etilmesi, BM Baş Assambleyası tarafından er sene Ukrainağa ait Qırım Muhtar Cumhuriyeti ve Aqyar şeeri, em de qısmen Qara ve Azaq deñizleriniñ arbiyleştirilüvi meselesi mevzusında qararnamelerniñ qabul etilmesi dünyada Rusiyeniñ cinayetleri unutılmayıp, aynı vaqıtta devletimizniñ topraq bütünligini ğayrıdan tiklev oğrunda halqara ortaqlarımız Ukrainanen beraber küreşmege devam etkenine işaret ete. Bu adiselerniñ er biriniñ arqasında siyasetçilerniñ ve diplomatlarnıñ emekleri turmaqta.
Ukraina Prezidentiniñ Qırım MC-deki Temsilcilikniñ taqımı ukrain diplomatları adına Diplomatik hızmetniñ hadimleri künü ile hayırlavlarğa qoşula.
Ukraina adından çıqışlarda bulunmaq, bir diplomat içün eñ mesüliyetli vazifedir. Muvafaqiyetleriñizni vaqtınca işğal etilgen topraqlarda yaşağan insanlar nezaret etip, yüksek ihtisaslı faaliyetiñiz ve becerikligiñiz Ukrainanıñ muvafaqiyetli olmasına, işğalden azat etüvge ve ğayrıdan integrasiya etüvge, millionlarnen insanlarnıñ umumukrain siyasiy ve medeniy saalarına qaytmasına hızmet etecegine ümüt etmekte.