Vaqtınca işğal etilgen Qırım Muhtar Cumhuriyetinde ve Aqyar şeerinde vaziyetni nezaret etüv çerçivesinde Ukraina Prezidentiniñ Qırım Muhtar Cumhuriyetindeki Temsilciligi Aqmescitte ve Aqyarda zapt etilgen universitetlerniñ sözde ”halqara faaliyetini” de nezaret etmektedir. İşbu universitetlerde çalışqan alimlerniñ halqara tedbirlerde ve tedqiqatlarda iştirak etmek ıntıluvları ve iştirak etüv adiseleri, onlayn şekilde ”halqara tedbirlerni” keçirmek ıntıluvları qayd etile.

Temsilcilik mütenasip malümatlarnen Ukraina tasil ve ilim nazirligine muracaat etti. Ukrainanıñ milliy menfaatlarını qorçalamaq ve halqara itibarını yükseltmek, ilmiy, ilmiy-tehnikiy ve yañılıqlar (inovatsion) saalarında musaviy şekilde Ukrainanıñ halqara alâqalarını inkişaf ettirmek ve Qırım Muhtar Cumhuriyetini ve Aqyar şeerini işğal etken Rusiye Federatsiyasınıñ böyle tedbirler vastasınen ilhaq etüv teşebbüsini qanunlaştırmaq intıluvlarına yol bermemek maqsadınen Nazirlik Temsilcilikniñ mektübini aliy oquv yurtlarınıñ ve ilmiy müessiselerniñ reberlerine yollap, ilmiy tedbirlerge azırlanğanda ve olarnı keçirgende Temsilcilik tarafından bildirilgen malümatlarnı diqqatqa almağa, olar aqqında aliy oquv yurtlarınıñ hadimlerini haberdar etmeğe rica etti.