Ukraina Prezidentiniñ Qırım MC-deki Daimiy Temsilcisiniñ muavini Tamila Taşeva Qırım_SOS cemaat teşkilâtı ”ARTİF” Tbilisi platforması ile beraberlikte yapqan ”Yerastı çıqmaz” adlı sanat obyektini taqdim etüvde iştirak etti.
”2014 senesi Rusiye Federatsiyası cezalavlarını Qırım yarımadasında Maydandan soñ peyda olğan teşebbüslerinde iştirak etken faalcilerni taqip etüvden başlap, cemaat teşkilâtlarınıñ azalarına ve qırımtatar milliy areketiniñ iştirakçilerine basqısını daimiy şekilde arttırmaqnen devam etti. Bundan soñ Qırımğa qaytmağa tırışqan qırımtatar halqınıñ lideri Mustafa Cemilevge qol tutqan insanlar da cezalavlarğa oğratıldı. Amma vaqtınca işğal etilgen Qırım içün eñ qıyın vaqıt 2018-2019 seneleri oldı. Misal olaraq, 2019 senesi ”Qırım birdemligi” areketiniñ 27 azası aynı vaqıtta yaqalandı. Halqara tedbirlerde sıq-sıq statistika aqqında laf yürsetemiz, amma er bir raqamnıñ arqasında muayyen insan turmaqta. Siyasiy mabuslarnıñ erkseriyetini men şahsen tanıyım, Server Mustafayev kibi bazılarına arqadaşlarım ayta bilem. Er kesni Kıyivde ”Ukrain evi” Milliy merkez ile Ukraina Milliy filarmoniya arasında yerleşken Avropa Meydanındaki yerastı keçitine tüşmege ve işğalden azat etilmek, öz toprağında serbest yaşamaq ve tuvğan dinini kütmek oğrunda küreşmege devam etken insanlarnıñ taqdirlerinen tanışmağa davet etem”, – dep ikâye etti taqdim etüv esnasında Ukraina Prezidentiniñ Qırım MC-deki Daimiy Temsilcisiniñ muavini Tamila Taşeva.
Malüm olğanı kibi, gürci ressam David Kuhalaşvili, yoldan keçken er bir insan Putin rejiminiñ Qırım makümleri yıllar devamında bulunğan muitni is ete bilsin dep, yerastı keçitte bir ”apishane koridorını” yarattı. Koridornıñ duvarları beyaz ve mavı boyalanen boyalanğandır. Olarnıñ üstünde kerçek kibi körüngen demir qapılarnıñ resimleri yapılğan. Er bir ”ücreniñ” qapısında QR kod yerleştirilgendir, işbu kodnı skan etip, siyasiy ve diniy körüşleri em de faal cemaat areketleri sebebinden Kreml tarafından apishanege atılğan er bir Qırım maküminiñ taqdirinen tanış olmağa mümkün.
Duvarlardaki badana boyası, yanıp söngen yarıqlar ve kirli taban can sıqıcı müitni quvetleştire.
İşte böyle şaraitlerde al-azırda 98 Qırım sakini, Kremlniñ siyasiy mabusları gece-kündüz buluna. İşğalci RF akimiyeti olarnı uydurma terorizm, aşırıcılıq ve casuslıq qabaatlavları esasında qanunsız şekilde azatlıqtan marum etti.
Bu adamlar Qırım ve Rusiye apishanelerinde deşetli şaraitlerde tutula. Böyle adiselernen bağlı bütün malümatlarnı Qırım_SOS talilcileri tarafından ”Qırım siyasiy mabuslarnıñ bulunuv şaraitleri” tedqiqatında toplanğandır, onıñ tam metini ile bu yerde tanış olmağa mümkündir: https://cutt.ly/9kzdl5f