Marafonnıñ ”Kiçik aynıñ 26-sı – bu vaqialar ne içün yüz berdi, mesüliyetke kimler çekilmeli?” mevzusındaki birinci panel munaqaşası esnasında munaqaşa iştirakçileri müim fikirlerinen paylaştılar.

Qırımtatar Milliy Meclisiniñ reisi Refat Çubarov:

”Kim qabaatlı? Müim bir sual. Amma şimdi esas vazifemiz, egemenligimizni ğayrıdan tiklevdir. Qırımdaki Ukraina vatandaşları Ukrainağa qaytmalarını bekleyler, onıñ içün Qırımnı qaytaruv ve Ukrainanıñ egemenligini ğayrıdan tiklev oğrunda em halqara, em milliy seviyede bütün imkânlarımıznı birleştirmelimiz”.

Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini Darya Svırıdova.

”Eñ müim mesele, adaletni ğayrıdan tiklev meselesidir. Aqiqatnı bilmek ve bu vaqialarnı hatırlamaq. Qarşılıq köstergen insanlar aqqında hatırlamaq (100-ge yaqın siyasiy mabuslarımız bar). Vaqtınca işğal etilgen topraqlarda yaşağan Ukraina vatandaşları ile daimiy bağ tutmaq ve Ukrainanıñ yarımada üzerinde nezaretiniñ ğayrıdan tiklenmesine azır olmaq”.

Qırım Muhtar Cumhuriyeti ve Aqyar şeeri Prokuraturasınıñ reberi İgor Ponoçovnıy:

”Rusiye halqara uquq şartlarını körmemezlikke urğanını numayış etti. Rusiye yarımadanı kiçik aynıñ 27-de öz nezareti altına keçirdi ve işbu hayaliy nezaretni tiklevden evel kerçekleştirilgen areketler içün Ukraina vatandaşlarını cezalay. Kütleviy şekilde qorçalav aqqınıñ bozuluvı ve protsesual bozuluvlar qayd etildi”.

Ukraina milliy hatıra institutınıñ başlığı Anton Drobovıç:

”Qırım aqqında bir qaç kitap neşir etildi. Olarnıñ arasında yarımadanıñ işğal etilmesinen bağlı adiselerde iştirak etken adamlarnıñ sözlü-tarihiy şaatlıqları ve tarihiy kitaplar.
Al-azırda Rusiye Federatsiyası tarafından Qırım topraqlarınıñ zapt etilmesi ceryanınıñ bütün daqiqalarını ve künlerini aks ettirgen onlayn platformanıñ teşkil etilmesi üzerinde faaliyet devam emekte. Biz bunı hatırlamalıymız, çünki hatıramız adaletniñ ğayrıdan tiklenmesine ümüt bermekte”.