2021 senesi saban ayınıñ 3-de Rostov-na-Donu şeerindeki Cenübiy okrugınıñ arbiy mahkemesi Qırım sakini Oleg Prıhodkonı qattı tertipli koloniyada 5 yılğa maküm etti.

Oleg Prıhodko 62 yaşında, bütün ömürini o, Qırımda keçirdi. Esasen madencilik ile demirciliknen oğraşıp, künlerini keçire edi. 2014 senesi ömür arqadaşı Lübov ile Saq rayonınıñ Orehovo köyüne köçken edi. İşğalden evel Prıhodko milletçi ”Svoboda” (”Azatlıq”) fırqasınıñ Saq rayonındaki bölügine reberlik yapa edi, 2014 senesi sözde ”Qırım şurası” fırqanı yasaq etken soñ, faaliyetini toqtattı, amma kimerde bir Kıyiv şeerine dostlarınen ve fırqadaşlarınen körüşmege kelip kete edi. Qırım yarımadası 2014 senesi işğal etilgen soñ, Prıhodko rus akimiyetini tanımağa istemedi: ariza yazıp, yañı vatandaşlıqtan ve pasporttan vazgeçti ve yüz bergen adiselerge narazlığını açıqtan bildire edi. 2016 senesi ilk yaz ayında şeer künü arfesinde Qırımda endi yasaq etilgen ukrain avtomobil nomeralarını qullanğanı içün Prıhodko 3 künge apis etilgen edi. 2019 senesi berim ayında aqay-apay Prıhodkolar FSB-nıñ Aqmescit şeerindeki Qırım idaresine sorğuğa çağırılğan edi.

Oleg Prıhodko Qırımda 2019 senesi ekim ayınıñ 10-da işğal etilgen yarımadada terroristik areket yapacağında şeklenip yaqalanğan edi. Tintüv esnasında onıñ garajında patlayıcı maddeler tapılğan edi. ”Mahkemede” Prıhodko işbu maddelerni Federal Havfsızlıq Hızmetiniñ hadimleri ketirip taşlağanını bildirdi.
Sözde terroristik areket yapmağa ıntılğanı ve 2019 senesiniñ yazında Rusiye Federatsiyasınıñ Lviv şeerindeki Baş konsullığını yaqmağa azırlanğanı içün Oleg Prıhodkoğa qarşı açılğan dava boyunca üküm çıqarıldı.

”İşğal etilgen Qırımda men Putinge keder ettim. Umumiy seadet manzarasını bozğanım içün yaqalandım”, – ukrain faali Oleg Prıhodkonıñ üküm çıqaruvdan evel soñki sözleri.

Ukraina Prezidentiniñ Qırım MC-deki Temsilciligi Rusiye Federatsiyasına boysunmağan Ukraina vatandaşlarını taqip etken işğalci akimiyet organlarınıñ areketlerini takbih ete, taqip etüvnen bağlı er bir adiseni qayd ete ve elde etilgen malümatlarnı ukrain uquq qorçalav organları ve halqara teşkilâtlarınen muzakere ete.

Oleg Prıhodko davası aqqında tafsilâtlı malümat ”Gratı” matbuat vastasınıñ maqalesinde: https://graty.me/…/ya-ne-snimal-flaga-ukrainy…/