2014 senesi saban ayınıñ 9-da Taras Şevçenkonıñ 200-yıllığı munasebetinen Aqmescit şeerinde keçirilgen mitingde 2000 yaqın insan toplandı. Tedbirni teşkil etken Andriy Şçekun ve Anatoliy Kovalskiy abide yanına öyle de kelip çıqmadılar. Bundan soñ belli olğanı kibi, olar Aqmescit şeeriniñ demiryol vokzalında tren vastasınen kelgen Ukraina bayraqlarını qarşılağan arada apis etilgen edi.
Miting teşkilâtçıları ”milisler” tarafından yaqalandı, bundan soñra olarnı ”Rus birdemligi” fırqasınıñ Karl Libkhnet soqağındaki ofisinde yerleşken Rusiye arbiylerine teslim ettiler. Ukrainağa qol tutuv olaraq keçirilgen tedbirniñ teşkilâtçıları 10 kün devamında qanunsız şekilde tutulğan, qorqutılğan ve qıynalğan soñ, 2014 senesi saban ayınıñ 20-de Kıyiv şeerinden kelgen avtomeydancı Oleksiy Grıtsenko, Sergiy Supun ve habersiz ğayıp olğanlar sayılğan daa 5 faal ile beraber Qırımdan sürgün etilgen ediler.
Qırımdaki Ulu Kobzarnıñ abidesi yanında soñki kere bu qadar çoq insan toplanğan edi. İşğal başlanğan soñ, işğalci Rusiye memuriyetiniñ vekilleri vaqtınca işğal etilgen Qırım Muhtar Cumhuriyeti ve Aqyar şeeri topraqlarında Taras Şevçenko hatırasınıñ añılmasına keder etmege başladı. İşğalci Rusiye akimiyetini Qırımda Ukraina ile birdemlikniñ bir-de-bir şekilde izar etilmesi qorquta, olar taqip etüv, qorqutuv, Qırımnı mecburen terk ettirüv ve eñ faal vatandaşlarımıznı apishanelerge oğratuv vastasınen bu kibi areketlerni tamamen yoq etmege tırışalar.
2015 senesi saban ayınıñ 9-da Ukraina bayraqları ile çıqqan faaller Veldar Şukurciyev, Oleksandr Kravçenko ve digerleri yaqalanğan edi.
Kobzarnıñ abidesi yanına er yıl saban ayınıñ 9-da çiçeklerniñ qoyulması işğalcilerge Qırım yarımadasınıñ sakinleri qarşılıq köstermege devam etkenleri aqqında hatırlata.
Bugün, 2021 senesi saban ayınıñ 9-da, sabıq Qırım sakinleri Kıyiv şeerindeki Taras Şevçenkonıñ abidesi yanında keçirilgen Ukrainalı Qırım ile er yıllıq birdemlik tedbirine toplanacaqlar.
🇺🇦 Bu yıl keçirilecek tedbir esnasında Qırım sakinlerine azat etilgen siyasiy mabuslar, evelde Qırımda çalışqan jurnalistler ve cemaat erbapları, Qırımtatar Milliy Meclisiniñ azaları, devlet akimiyeti organlarınıñ vekilleri, aq qorçalaycılar ve lâqayd qalmağan diger vatandaşlar muracaat etecek.