Ukraina Prezidentiniñ Qırım Muhtar Cumhuriyetindeki Temsilciliginde Regional Center for Human Rights teşkilâtı ile Ukraina içtimaiy siyaset Nazirliginden meslekdeşlerimiznen körüşüv olıp keçti. Öksüz balalarnıñ ve ana-baba qayğıruvından marum qalğan balalarnıñ Qırım Muhtar Cumhuriyetiniñ ve Aqyar şeeriniñ vaqtınca işğal etilüvi sebebinden bozulğan aqlarını ğayrıdan tiklemek maqsadınen qanunlarğa ve normativ-uquqiy senetlerge yapılması zarur olğan deñişmeler muzakere etildi.
Aşağıdaki meseleler muzakere etildi:
📌 vaqtınca işğal etilgen topraqlardan ana-babasız kelgen balalarğa memleket içinde avuşqan şahıs malümat kâğıdını berüv;
📌 vaqtınca işğal etilgen topraqlardan kelgen balalarnı vasiylik altına aluv ve olarğa er aylıq maddiy yardımnı berüv;
📌 vaqtınca işğal etilgen topraqlardan ana-babalarnı ana-babalıq aqqlarından marum etüvnen bağlı mahkeme qararları;
📌 vaqtınca işğal etilgen topraqlardan kelgen balalarnıñ aq-uquqlarına riayet etilmesi içün akimiyet organları neler yapa bile;
📌 vaqtınca işğal etilgen Qırım MC ve Aqyar şeeri topraqlarında yaşağan balalarnıñ aqqlarını mahkemelerde nasıl akimiyet organı qorçalamalı;
📌 balalarnı Ukraina ile bağlağan zıncırçıq nasıl etip saqlana ve quvetleştirile bile, yüzlernen ukrain balaları uquqiy boşluqtan nasıl etip çıqarıla bile.
”Öksüz balalarnıñ ve ana-baba qayğıruvından marum qalğan balalarnıñ işğalci akimiyet tarafından aqqları bozulğanınıñ esas sebeplerinden biri, Rusiye Federatsiyasınıñ vaqtınca işğalniñ başında Qırımda yaşağan balarnı bir taraflama şekilde Rusiye vatandaşları olaraq qabul etmesidir. Bu balalarnıñ aqqlarını qorçalamağa qolay degil, çünki ameldeki milliy qanunlar Ukraina topraqlarınıñ bir qısımı vaqtınca işğal etilmesinen bağlı hususiyetlerni diqqatqa almay. Vasiylik ve qayğurıv ile oğraşqan organlarnıñ vekâletlerini milliy seviyede pekitmek kerekmiz”, – dep qayd etti Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini Darya Svırıdova.
Temsilcilikniñ mütenasip faaliyeti 2019 senesi aynı vaqıtta bir qaç yönelişte başlanğan edi. İnsan aqları boyunca Avropa mahkemesiniñ Vekâletlisi ile körüşüvler ötkerildi ve vaqtınca işğal etilgen Qırımda yaşağan öksüz balalarğa ve ana-baba qayğıruvından marum qalğan balalarğa nisbeten vasiylik ve qayğurıv ile oğraşqan organlarnıñ vekâletleri boyunca İnsan aqları regional merkezi ve Ukraina içtimaiy siyaset Nazirligi ile işbirlik başlandı. Bundan ğayrı, Temsilcilik Ukraina adliye Nazirligine insan aqları saasında Milliy strategiyanıñ leyhasına öz tekliflerini taqdim etti.