Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini Darya Svırıdova izaatlay:
”İnsan aqları saasında Milliy strategiyani qabul etüv, insan aqlarina ve serbestliklerine riayet etüvge dair devlet strategiyasını inkişiaf ettirüv ve mükemmeleştirüv, yerine ketirüv ve qorçalavğa dair tesirli vastalarnı teşkil etüv yolunda müim adımdır. Aynı vaqıtta o, devlet ve grajdan cemiyeti vekilleri arasındaki semereli işbirlikniñ misalidir.
Temsilcilik vesiqanı yaratuv ceryanına qoşulğan edi ve vesiqada taqımımıznıñ kündelik faaliyeti içün müim bölükler bulunğanını alğışlay:
🔹vaqtınca işğal etilgen Ukraina topraqlarında yaşağan şahıslarnıñ aq-uquqlarını temin etüv ve işbu aqlarğa riayet etüv;
🔹Rusiye Federatsiyasınıñ silâlı tecavüzi neticesinde yüz bergen silâlı davanıñ aqibetlerini aşuv, şu cümleden keçici devirdeki adaletke dair milliy strategiyanı qabul etüv;
🔹RF silâlı tecavüzi sebebinden Ukraina topraqlarınıñ bir qısmı vaqtınca işğal etilgeni neticesinde azatlıqtan marum etilgen şahıslarnı azat etüv ve olarnıñ aq-uquqlarını ğayrıdan tiklev.
Bundan ğayrı, misal olaraq, strategiyanıñ vazifeleri arasında, Ukraina tamır halqlarınıñ statusını belgilev ve vaqtınca işğal etilgen Qırım Muhtar Cumhuriyeti ve Aqyar şeeri topraqlarında tamır halqlarınıñ aq-uquqlarını ve serbestliklerini qorçalavğa dair teşebbüslerniñ yerine ketirilüvini temin etüv”.
Kelecekte grajdan cemiyeti, akimiyet organlarınıñ vekilleri ve insan aqları saasında mütehasıslar tarafından işbirlikte yapılacaq olğan 2021-2023 seneleri içün strategiyanı yerine ketirüvge dair areket Planını azırlav boyunca müim faaliyet bizni beklemektedir.
Ukraina adliye Nazirliginde çalışıp, strategiyanıñ azırlanması ve umumiy maqsad oğrunda devlet ve grajdan sektorılarınıñ ğayretlerini birleştirüv içün mesüliyet çekken meslekdaşlarımızğa minnetdarlığımıznı bildiremiz.
Fermannıñ tam metini ile bu yerde tanış olmaq mümkün: