”Çerkası” deñiz tarama gemisi – Qırımnıñ Rusiye tarfından işğal etilüvine qarşılıq kösterüvniñ timsalidir, o, rus arbiyleri tarafından soñki zapt etilgen ukrain gemisidir.
Qırım işğal etilgen soñ, saban ayınıñ 20-de ruslar ukrain arbiylerinden Rusiye tarafına keçmege talap ettiler ve bu aqta qararnıñ alınması içün bir künlik müddet bergen ediler.
2014 senesi saban ayınıñ 21-de 12 deñizci (2 zabit, 1 miçman ve 9 gemici) vazifelerini boşatqanları aqqında arizalar yazıp, gemini terk ettiler.
”Kostântın Olşanskıy” desant gemisi ve ”Geniçesk” tarama gemisi meslekdeşlerine qol tuttılar.
Bundan evel, aynı şu 2014 senesiniñ saban ayında, Rusiye askerleri Donuzlav limanından çıqışta «Oçakov» ve «Şahtar» gemilerini ve soñra daa 2 gemini suvda batırdılar. Bu sebepten Ukraina Arbiy-Deñiz Quvetleri gemileri limandan çıqıp olamadı.
Saban ayınıñ 21-de Donuzlav üzerinde Rusiye vertolötları uçmağa başladı, yalıda ise mergin nişancılar yerleşti.
Aynı şu künü kapitan Yuriy Fedaşnıñ yolbaşçılığındaki ”Çerkası” gemisiniñ taqımı Donuzlavdan çıqıp, Odesaga areket etmege tırıştı, amma yolunda say yerler rast kelgeni içün maqsadına irişip olamadı. Saban ayınıñ 22-de gemi toqtamayıp Donuzlav limanınıñ içinde areket etti, Rusiye arbiyleri ise areketlerini közetti. Saban ayınıñ 23 gemi eki batqan rus gemisi arasından tekrar keçmege tırıştı. Bunı aman-aman yapıp oldılar, amma Rusiye kateri olarğa ücüm etken soñ ”Çerkası” gemisiniñ burnı say yerine kirdi, vucudında teşik peyda oldı, dümeni bozuldı. Saban ayınıñ 24-de ruslar ”Kostântın Olşanskıy” gemisini zapt etken soñ, ”Çerkası” Donuzlavda ukrain bayrağı altındaki yekâne arbiy gemi olaraq qaldı.
Saban ayınıñ 25-de aqşam Rusiye arbiyleri eki vertolöt ve üç vızlı kater yardımınen ücüm etmege başladı. Muarebe eki saatten ziyade devam etti. ”Çerkası” duşmannı qoqutmaq içün ateş açtı. Ruslar da yalıñız geminiñ burnını nişanğa aldılar. Tarama gemisiniñ dümen qısımı tamamen bozulğan soñ, Rusiye arbiyleri gemini zapt etti.
Saban aynıñ 26-da saba ”Çerkası” taqımı gemini tekmil terk etti.
Deñizciler Taras Şevçenkonıñ resimini ve gemi tuğrasını yanlarına aldı, birazdan olar müzey eksponatlarına çevirildi. Arbiy bağraq kapitan Yuriy Fedaşta saqlana.
Bu vaqialar aqqında ”Çerkası” filmi çıqarıldı. İşbu film ilk kere 2020 senesi kiçik aynıñ 25-de numayış etildi.
Ukrain arbiyleriniñ cesürligini alğışlaymız, olarnıñ grajdanlıq mevamları, antlarına sadıq qanlanları ve körünişte umutsız vaziyette faal areketleri ile ğururlanamız. Rusiye işğaline qarşılıq kösterüv devam ete.