Subet esnasında taraflar bir sıra aktual meselelerni, şu cümleden Qırım platforması teşkil etici sammitiniñ keçirilmesini, memuriy sıñırdaki vaziyetni, vaqtınca işğal etilgen Qırım sakinleriniñ ve Qırım Muhtar Cumhuriyeti ile Aqyar şeerinden memleket içinde avuşqan şahıslarnıñ aq-uquqlarını ve qanuniy menfaatlarını qorçalamaq maqsadınen Ukraina tarafından alıp barılğan tedbirlerni muzakere ettiler.

Hususan Anton Korınevıç Qırım platformasınıñ ğayesi ve teşkil etilmesi, teşkil etici sammitniñ keçirilmesi ve bundan soñ daimiy şekilde işlemesi aqqında ikâye etti.
Bundan ğayrı, Anton Korınevıç vatandaşlar karantin sıñırlamalarına riayet etip, memuriy sıñırdan adetteki şekilde keçe bilgenini, vaqtınca işğal etilgen topraqlardan kelgen şahıslar KOVID-19 ekspress testini KÇNN-nıñ özünde tapşıra bilgenlerini haber etti.

Daimiy Temsilciniñ qayd etkenine köre, devletimiz memleket içinde avuşqan şahıslarnıñ ve Qırım sakinleriniñ aq-uquqlarını ve imkâniyetlerini temin etmek içün qolundan kelgenini yapmaqtadır. Al-azırda Temsilcilik Ukraina dijital deñişüvler Nazirliginen beraber işbu vatandaşlar kategoriyası içün onlayn hızmetlerniñ amelge keçirilüvi üzerinde çalışmaqtadır.

Temsilcilik ABD Akimiyetiniñ vekillerine vaqtınca işğal etilgen Qırımda yaşamağa devam etken ya da mecburen Ukrainanıñ diger köşelerinde avuşqan Ukraina vatandaşlarınıñ aq-uquqlarını ve serbestliklerini qorçalamağa yardım etkenleri içün öz minnetdarlığını bildire.