Vaqtınca işğal etilgen topraqlarda doğuv ve ölüm adiselerini qolaylaştırılğan usulnen qayd etüv boyunca Ukraina Prezidentiniñ Qırım Muhtar Cumhuriyetindeki Temsilciligi, Ukrainanıñ vaqtınca işğal etilgen topraqlarını ğayrıdan integratsiya etüv meseleleri boyunca Nazirlik ve başqa vekâletli organlar beraberlikte keçirgen muşavere neticesinde Ukraina Baş Naziri O. Reznikov yuqarıda qayd etilgen adiselerni mahkeme ceryanı vastasınen belgilevge dair Ukraina Yuqarı mahkemesi terkibindeki İstinaf grajdan mahkemesine mektüp yolladı.

Ukraina Yuqarı mahkemesi terkibindeki İstinaf grajdan mahkemesi mütenasip muracaatnı baqıp çıqqan soñ, vaqtınca işğal etilgen topraqlarda yüz bergen doğuv ve ölüm adiselerini yerli mahkemelerde belgilev ceryanını añlattı.
Bundan evelki tertipke köre, vaqtınca işğal etilgen topraqlarda yüz bergen doğuv ve ölüm adiselerini belgilevge dair mahkemege muracaat etmezden evel, vatandaşlar grajdanlıq vaziyeti aktları bölüklerine muracaat etmek ve olardan red etüvni almaq kerek ve yalıñız bundan soñ mahkemege mütenasip adiseni belgilevge dair muracaat ete bile ediler.

Vatandaşlarımıznıñ ögünde turğan qıyınlıqlarnı diqqatqa alğan Ukraina Yuqarı mahkemesi terkibindeki İstinaf grajdan mahkemesi doğuv ve ölüm adiselerini belgilev tertibini añlatqan Ukraina grajdan protsesual kodeksni baqıp çıqqan soñ, vatandaşlardan grajdanlıq vaziyeti aktları bölüklerinden yazılı şekilde red etüvni istegen yerli mahkemelerniñ talabı ameldeki Ukraina qanunlarına esaslanmağanını belgiledi.

Endiden başlap, vaqtınca işğal etilgen topraqlarda yaşağan vatandaşlarımız vaqtınca işğal etilgen topraqlarda yüz bergen doğuv ve ölüm adiselerini qayd etüvge dair doğrudan-doğru mütenasip mahkemege muracaat etip, bundan soñ doğuv ya da ölüm adisesini grajdanlıq vaziyeti aktları bölüklerinde qayd etip, doquv ya da ölüm aqqında resmiy şeadetname ala bileler.

Ukraina Yuqarı mahkemesi terkibindeki İstinaf grajdan mahkemesi istinaf ve yerli mahkemelerge mevamını mütenasip mektüp ile bildirdi.