2021 senesi ilk yaz ayınıñ 14-de Qazahistandaki Ukraina elçihanesiniñ teşebbüsi ile Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Qazahistan ve Merkeziy Asiya devletlerindeki studentler, matbuat vastaları ve ukrain cemiyetiniñ vekilleri içün onlayn şekilde lektsiyasını oqudı.
Lektsiya esnasında esas diqqat Qırımnı işğalden azat etüv meselesine ayırıldı, şu cümleden, ”Qırım platformasınıñ” yaqın kelecekte keçirilecek ilk sammitiniñ esas yönelişleri ve Qırım yarımadasınıñ Rusiye Federatsiyası tarafından işğal etilmesi sebebinden bozulğan insan aqlarını ve serbestliklerini qorçalav oğrunda ilk nevbetteki devlet vazifelerini belgilegen ”Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüvge dair devlet strategiyası” qayd etildi. Muim tarihiy adım olaraq qanun seviyesinde tamır halqlarınıñ statusını belgilep pekitken, aqlarını kefil etken ve inkişaf etüv strategiyası olaraq hızmet etecek ”Ukraina tamır halqları aqqında” qanun leyhası Ukraina Yuqarı Şurasına taqdım etilgenine ayrıca diqqat etildi.
Anton Korınevıç Qırım yarımadasında insan aqlarını bozuv saasında vaziyetnen diñleyicilerni tafsilâtlı şekilde tanıştırdı: qırımtatarlar kütleviy sürette cezalavlarğa oğratıla, qırımtatar halqını eñ yüksek seviyede temsil etken Qırımtatar Milliy Meclisi yasaq etildi, işğalci akimiyetniñ areketlerinen bir-de-bir şekilde razı olmağan insanlar siyasiy sebeplerden tevqif etilip apis cezasını çeke, evlerinde tintüvler keçirile, tasil saasında arbiyleştirüv ve propaganda üküm süre, söz ve din serbestlikleri sıñırlana. Muzakere etüv esnasında Daimiy Temsilci tedbir iştirakçileriniñ suallerine cevap berdi, şu cümleden yabancılar vaqtınca işğal etilgen Qırım Muhtar Cumhuriyeti ve Aqyar şeeri topraqlarını nasıl etip ziyaret ete bilgenlerini añlattı.
Temsilcilik lektsiyanı teşkil etken Qazahistandaki Ukraina elçihanesine ve tedbirde iştirak etken, suallerini bergen ve Ukraina topraqlarınıñ bir parçası olğan Qırım mevzusınen meraqlanğan iştirakçilerniñ cemisine öz minnetdarlığını bildire.