Oraq ayınıñ 8-de Ukraina Prezidentiniñ Qırım Muhtar Cumhuriyetindeki Daimiy Temsilciniñ Birinci muavini Darya Svırıdova ”Renaissance” Halqara fondu ile beraberlikte Felemenk Qırallığınıñ Ukrainadaki Elçihanesiniñ MATRA leyhasınıñ qol tutuvı ile ”Ukrainian Legal Advisory Group” tarafından teşkil etilgen «Tınçlıqnı tiklevniñ bir parçası olğan adalet: Ukraina içün semereli şekilini qıdıruv» mevzusındaki tedbirde iştirak etti.

Munaqaşa esnasında halqara ve yerli ekspertler Ukraina milliy adalet tertibatınıñ imkâniyetleri ceetinden eñ ağır cinayetler içün mesüliyetsizlik ile küreş kibi mevzularnı çeşit türlü taraflardan muzakere ettiler. Bundan ğayrı, Ukrainada adaletni tiklev ceryanında halqara cemiyetniñ rölü ve halqara vastalarnı işletüv muzakere etildi.

Rusiye Federatsiyasınıñ Ukrainağa qarşı silâlı tecavüzi ve Qırım Muhtar Cumhuriyeti ile Aqyar şeeriniñ vaqtınca işğal etilmesi çoqtan-çoq qaba insan aqlarnı bozuvğa ve arbiy cinayetlerge sebep oldı, şu işğal etilgen topraqlarda yaşağan Ukraina vatandaşları ise olarnıñ qurbanlarına çevirildi.

Böyleliknen, keçici devirde adalet saasında Rusiye Federatsiyasınıñ silâlı tecavüzi neticesinde ketirilgen zararlarnıñ ödenmesi, eñ ağır cinayetlerde qabaatlı olğan şahıslarnıñ mesüliyetke çekilmesi, insan aqlarınıñ qorçalanması ve ğayrıdan tiklenmesi kibi tedbirlerni amelge keçirüv 2021 senesi saban ayınıñ 24-de Ukraina Prezidenti tarafından tasdıqlanğan ”Vaqtınca işğal etilgen Qırım MC ve Aqyar şeeri topraqlarını işğalden azat etüv ve ğayrıdan integratsiya etüv Strategiyasınıñ” esas ümdelerinden biridir.

”Soñki eki yıl devamında Temsilcilik taqımı vaqtınca işğal etilgen Qırım yarımadasında yaşağan Ukraina vatandaşlarından 9000 ariza aldı, olarnıñ ekseriyeti aqlarınıñ bozulması ile, işğalci akimiyet tarafından işlengen cinayetler ile bağlıdır. Bu kibi cinayetlerni qayd etüv ve olarnı taqip etüvnen ukrain uquq qorçalav organları ve Ukraina idaresi altında faaliyetlerini tiklegen adalet organları oğraşa. Bu faaliyet em vatandaşlarımıznı qorçalav, em de devletimizniñ itibarını arttıruv ceetinden pek müimdir. Onıñ içün işğalden azat etüv ve ğayrıdan integratsiya etüvge dair devlet siyasetini vucutqa ketirgen bir müessise olaraq adaletniñ tiklenmesi, eñ ağır cinayetler içün cezanıñ qaçınmamazlığı oğrunda keyfiyetli faaliyetke ve ögümizde turğan başqa vazifelerge aynı seviyede qıymet kesmektemiz”, – dep qayd etti öz çıqışında Darya Svırıdova.

Vaqtınca işğal etilgen Ukraina topraqlarını işğalden azat etüv ve ğayrıdan integratsiya etüvnen bağlı müim meselelerni ekspertler tarafından muzakere etilmesine imkâniyetler yaratqan ve Temsilcilik ile işbirlikte bulunğan ortaqlarımızğa minnetdarlığımıznı bildiremiz.