Oraq ayınıñ 19-da Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ”Qırımnıñ etraftaki müiti: işğal devrindeki deñişmeler ve ziyanlar” mevzsusında Qırım SOS cemaat teşkilâtı tarafından keçirilgen tedqiqatnıñ «Qırımnıñ etraftaki müitini kirletüv ve tabiat menbalarını zayıflatuv» mezusındaki 2-nci bölügini taqdim etüvde iştirak etti.

Tedqiqatnıñ bu qısmı tehnogen facialar ve telükeler, çöplük meselesi, suv menbalarını zayıflatuv, Qara ve Azaq deñizlerini kirletüv, tabiat baylığını nezaretsiz şekilde qullanuv, Qırım çöllerini sürüv ve ormanlaştıruv meselelerine bağışlanğandır.

”Vaqtınca işğal etilgen Qırım Muhtar Cumhuriyeti ve Aqyar şeeri topraqlarındaki ekologik vaziyet meselesi hususan Ukraina Prezidenti tarafından tasdıqlanğan vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv Strategiyası munasebeti ile Temsilcilik içün pek müimdir. Vaqtınca işğal etilgen Qırım Muhtar Cumhuriyeti ve Aqyar şeeri topraqlarındaki ekologik vaziyetini biz daimiy şekilde nezaret etmektemiz. Al-azırda tabiat-qoruq fonduna kirgen bir çoq obyektniñ yoq etilüvi, qanunsız şekilde faydalı malzemelerniñ istisal etilüvi kibi adiseler qayd etildi. Malümat Qırım Muhtar Cumhuriyeti ve Aqyar şeeri Prokuraturasına taqdim etildi, neticede mütenasip kriminal davalar açıldı ya da mevcüt olğan davalar malümatnen toldurıldı. Ekologiya mesesi Qırım yarımadasını işğalden azat etüvni maqsat etip qoyğan Qırım platformasınıñ faaliyetinde müim bir yer alacaqtır’‘ – dep qayd etti öz çıqışında Daimiy Temsilci.

”Qırım SOS cemaat teşkilâtı tarafından vaqtınca işğal etilgen topraqlardaki ekologik vaziyet boyunca kerçekleştirilgen ciddiy tedqiqat pek müim, kerekli ve vaqtında yapılğandır. Esabatta yer alğan talil ve tevsiyeler ”Vaqtınca işğal etilgen Qırım MC ve Aqyar şeeri topraqlarını işğalden azat etüv ve ğayrıdan integratsiya etüv

Strategiyasını” yerine ketirüvni maqsat etip qoyğan tedbirler Planını meydanğa ketirüv esnasında ve Qırım platformasınıñ faaliyetinde işletilecektir”, – dep yekünledi Anton Korınevıç.

Tedbirde tabiatnı qorçalav meseleleri boyunca ekspert Oleksiy Vasılük ve Qırım Muhtar Cumhuriyeti ve Aqyar şeeri Prokuraturasında silâlı dava şaraitlerinde işlengen cinayetler, teşkil etilgen ve halqara cinayetçilik ile küreşken organlar ve polis organları tarafından qanunlarğa riayet etüvni nezaret etken idareniñ müdiri Sergiy Turçın iştirak ettiler.