Bugün eki müim körüşüv olıp keçti. Birincisine Kanada temsilcileri – Ukrainadaki Kanada elçihanesindeki tışqı siyaset ve diplomatiya bölüginiñ müdiri Riçard Kolvin ve Şarqıy Avropa (Global Affairs Canada) bölüginiñ icra müdiresi Allison Stüart büyürdılar.

Ekinci körüşüvde Türkiye Cumhuriyetiniñ Ukrainadaki Elçihanesiniñ vekilleri: Türkiye Cumhuriyetiniñ Ukrainadaki Elçihanesiniñ Başlıq muavini Buket Kabbaki ve Türkiye Cumhuriyetiniñ Ukrainadaki Elçihanesiniñ Ekinci kâtibesi Ayşe Aydoğdu iştirak ettiler.

Bundan ğayrı, tünevin biz Avropa tışqı işler hızmetiniñ Rusiye, Şarqıy ortaqlıq, Merkeziy Asiya meseleleri boyunca idare müdiri Mihael Zibert ile körüştik.

Adet üzre biz çetelden kelgen musafirlerimizni Temsilcilikniñ ve Qırım Platforması Ofisiniñ faaliyetlerinen tanıştırdıq ve Qırım Muhtar Cumhuriyeti ile Aqyar şeerini işğalden azat etüv, işğal etilgen topraqlarda yaşağan şahıslarnıñ aq-uquqlarını qorçalav oğrunda kelecekteki işbirlik yollarını muzakere ettik.