Silâlı ve maskalı adamlar tintüv yapmaq içün eviñe ruhsetsiz ücüm etken vaqıttır. Olar seni ve yaqınlarıñnı qorquta. Eviñni ve… ömüriñni tar-mar ete.
«Qırım, saba saat 5» – pek küçlü ve tesir etici vesiqalı temaşa! «Qırım, saba saat 5» vesiqalı temaşanı taqdim etüv
Bu, işğalci Rusiye akimiyeti tarafından apishanege atılğan 11 siyasiy mabusnıñ taqdirleri.
Bu, Nariman Celâl, Server Mustafayev, Nariman Memedeminov, Suleyman Asanov, Seyran Saliyev, Osman Arifmemetov ve digerlerniñ ikâyeleri.
Kıyiv şeerinde işbu vesiqalı film ilk kere Jurnalistlerge qarşı cinayetlerni ve cezasızlıqnı toqtatuv halqara kününde numayış etildi.
«Qırım, saba saat 5» tek sanat aqqında ikâye etken temaşa degildir. O, vesiqalaştıruv aqqındadır. Biz endiden başlap bütün cinayetler ile zorbalıqlarnen bağlı adiselerni vesiqalaştırmaq kerekmiz. Bunıñ maqsadı ilk nevbette qabaatlı şahıslarnı eñ yaqın vaqıtta mesüliyetke çekmektir.
Müelliflerge eserleri vastasınen yaşatılğan duyğular, bu ağrı ve bu siñir içün minnetdarmız.
Temaşanı aşağıdaki bağlantı vastasınen seyir etmek mümkün: https://youtu.be/rwy9KpLxkdw
Temaşanı Qırımtatar Milliy Meclis ve Ukrainadaki USAİD leyhasınıñ qol tutuvı ile ”Dollmen” teatri sanalaştırdı.
Vesiqalı temaşa maküm etilgen 11 grajdanlıq jurnalist ve olarnıñ qorantaları ile subetler esasında Nataliya Vorojbıt ve Anastasiya Kosodiy tarafından yazılğan pyesa esasında meydanğa ketirildi. Temaşanıñ rejissöri – Dmıtro Kostümınskıy.
Leyhanıñ idarecileri – Alim Aliyev, Nadiya Sokolenko. İstisalcı – Veronika Sklârova.
Temaşada Camala, Oksana Pokalçuk (Amnesty International Ukraine), Mıroslava Gongadze (jurnalist, aq qorçalayıcı, cemaat erbabı), Sevgil Musayeva (Ukrainska pravda), Ahtem Seyitablayev (rejissör, cemaat erbabı), Andriy Hlıvnük (”Bumboks” gruppasınıñ solisti), Vadım Karpyak (jurnalist, İCTV kanalında ”Söz serbestligi” kösterüvniñ alıp barıcısı), Katerına Molçanova (aktör), Katerına Pavlenko (”GoA” gruppasınıñ solisti), İrına İvançık (”Özüñe inan” hayriye fondunıñ teşkilâtçısı), Katerına Kalıtko (yazıcı) iştirak ettiler.
Tedbirde Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ve onıñ muavinleri bulundı.
Leyha aqqında tafsilâtlı malümat: https://5am.crimea.ua/