Ukraina Prezidentiniñ Qırım Muhtar Cumhuriyetindeki Temsilciligi vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Fedaratsıyasını temsil etken ve Ukraina vatandaşı, abulqat Edem Semedlâyevniñ azatlıqtan marum etilmesini maqsat etip qoyğan işğalci akimiyetniñ cinaiy areketlerini qattı sürette takbih ete.

Bugün sözde ”Aqmescit rayonı merkeziy mahkemesi” tarafından abulqat Edem Semedlâyevniñ sözde «polis talaplarına riayet etmegeni içün» qanunsız şekilde cezalanıp 12 künge memuriy apiske alınuvı ve oña 4 biñ ruble miqdarında cöreme kesilüvi vaqtınca işğal etilgen Qırım Muhtar Cumhuriyeti ve Aqyar şeeri topraqlarında Ukraina vatandaşlarını siyasiy, diniy baqışları ve ihtisaslı ve gradanlıq faaliyetleri içün taqip etüvden başqa bir şey degildir.

Eminmiz ki, Rusiye Fedaratsıyasını temsil etken işğalci akimiyetniñ Edem Semedlâyevğa qarşı mütenasip areketleri işğalci devletniñ mahsus quvetleri tarafından uydurılıp, siyasiy sebeplerden açılğan davalarda Ukraina vatandaşlarını qorçalağan abulqatnıñ ihtisaslı faaliyetinen bağlıdır.

Rusiye Federatsıyasını abulqat Edem Semedlâyevni deral azat etmege, vaqtınca işğal etilgen Qırımda cezalavlarını ve Ukraina vatandaşlarınıñ siyasiy baqışları, mevamları ve fikirleri içün, em de ihtisaslı ve grajdanlıq faaliyetleri munasebetinen taqip etilmesini toqtatmağa çağıramız.

Edem Semedlâyevğa qol tutuvımıznı bildiremiz. Ukraina bu ve başqa cinayetlerde qabaatlı olğan şahıslarnıñ mesüliyetke çekilmesi içün qolundan kelgenini yapacaqtır.