ESAS MEVZULAR:
▶️ Qanunsız şekilde 11 yılğa mahküm etilgen 66 yaşındaki qırımtatarı Zekirya Muratov, rusiyedeki saratov vilâyetiniñ balaşov cezahanesinden nijniy novgorod şeeriniñ № 5 tüzetüv cezahanesine avuştırıldı. Aynı zamanda, sözde “ekinci Aqmescit gruppası davasınıñ” iştirakçisi, qanunsız şekilde 14 yılğa mahküm etilgen Osman Arifmemetov, novoçerkaskniñ №3 SİZO-sından krasnoyarsk bölgesiniñ cezahanesine etap etildi. Olarnen beraber Rusten Şeyhaliyev, Ruslan Süleymenov ve Enver Ametov da başqa şeerlerge etap etildi.
▶️ Ukraina Silâlı quvetleri Qara deñizde rusiyeniñ “Forpost” adlı eñ paalı ücüm dronlarından birisini tüşürdi. Bu dron yerdeki maqsatlarğa darbe kösterilmesi maqsadınen 2 raketa taşıp ola, fiyatı ise $7 mln. İşğalciler bu dronnı Saq şeeri tarafından uçurğan edi.
İşğal cinayetleri
▶️ Aprelniñ 8-ne qadar Qırımda 217 insan işğalciler tarafından qanunsız şekilde mahküm etildi, olar arasında 134 qırımtatarı. Umumiy miqdardan mahküm etilgenler arasında 33 insan tevqif (22 – qırımtatarı), 149 ise apis etildi (olardan 99 qırımtatarı), 26 kişiniñ statusı daa belgilenmedi.
▶️ Aprelniñ 8-ne qadar işğal etilgen Qırımda işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 737 vaqia qayd etildi. Olar arasında 641 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 20 adise alâ daa baqıla.
▶️ İşğal etilgen yarımadada 19-ncı kere rus ordusında arbiy hızmetke celp etüv kampaniyası başlandı. Bu areketler halqara aqlarnıñ bozuluvı ve arbiy cinayettir.
▶️ Qanunsız şekilde 9,5 yılğa mahküm etilgen 65 yaşındaki siyasiy mabüs Oleg Prıhodko ceza izolâtorında tutula. Siyasiy mabüsniñ qızı bildirgenine köre, cezahane hadimleri onı ölgenine qadar ceza izolâtorında tutacaqlarınen qorquta.
▶️ 2023 senesi devamında sözde “Qırım mahkemeleri” işğal etilgen yarımadadan 500 ecnebiyniñ çıqarılması aqqında qarar çıqardı, ondan da ğayrı 22 kişiniñ sürgün etilmesi aqqında qarar alındı.
Qırım yarımadasınıñ askeriyleştirüvi
▶️ “ATEŞ” areketiniñ faalleri işğal etilgen yarımadada ava mudafaa sistemalarınıñ artmasını qayd ete. Böyle etip, işğal etilgen Canköy uçaq alanında qoşma uçaqquvar-raketa sistemaları yerleştirildi. İşğalciler olarnı saqlamay bile. Faaller rus komandanlığınıñ mümkün olğan yollarnen Qırımdaki müim arbiy obyektlerni qapatmağa tırışqanını, amma ava mudafaa sistemalarınıñ kritik seviyede yetmegenini bildirdi. Ondan da ğayrı, “ATEŞ” rusiyeniñ Qara deñizde arbiy yüklerni taşımaq içün armiyolmağan gemilerni qullanğanı aqqında malümat berdi. Aynı zamanda, işğalciler Camköyde arbiyolmağan astyapı yaqınlarında arbiy yedek anbarlarını yerleştirgen, bu ise yerli sakinler içün telüke teşkil etmektedir.
▶️ Açıq menbaalardan alınğan malümatqa köre, Oq Qapı köyünde rus işğalcileri tamirhane bazasını yerleştirdi, anda cebede zarar körgen tehnikanı ketirip, tamir eteler. Ondan da ğayrı, bir ay evelsi Ukraina Silâlı quvetleri tarafından ücüm etilgen “Belbek” uçaq alanında üç uçaq eskadrilyası tutulğanı qayd etile. “ATEŞ” areketiniñ faalleri vaqtınca işğal etilgen Qırımda rus arbiyleriniñ yerleşüv yerini taptı. Hususan, Canköyde olar arbiyolmağan astyapı yaqınlarında yerleşmekte.
▶️ 1 aprel künü işğal etilgen Aqyarda Şimal mol bölgesinde suvastı-diversiya qarşılığını teminlevden oqutuvlar keçirildi, şu cümleden reaktiv bombaatıcıları ve başqa silâlarnıñ qullanuvı da öğretildi. Aprel ayından başlap işğalci flot Cenübiy ve Şimal mollarında suvastı-diversiya qarşığından oqutuvlar keçirdi. 4 aprel künü işğalci arbiy qısımlardan birinde Körfez bölgesinde atış oqutuvları da kerçekleştirildi.
▶️ İşğalci akimiyetniñ sözde “temsilcisi” işğal etilgen Qırımda Ukrainağa qarşı cenkte qullanılğan dronlar içün parçalar yapılğanını bildirdi. Bu ise nevbetteki kere rus işğalcilerniñ Ukrainanıñ başqa topraqlarına da ücüm etmek içün Qırım yarımadasını arbiy baza olaraq qullanğanını köstere.
Zorlavnen seferberlik
▶️ Rusiye ordusınıñ eñ az 755 askeri defin etildi. Olar arasında 564 kişi ihtimal Ukraina vatandaşı. Defin etilgenlerniñ sayısı daa çoq ola bile, çünki definlerniñ çoqusı gizli şekilde yapıla.
▶️ İşğal etilgen Qırımdan eñ az 42 rf arbiy hadiminiñ esirge alınğanı tasdıqlandı, olarnıñ çoqusı ihtimal Ukraina vatandaşı.
İşğalci memuriyetleriniñ propagandası ve duşmanlıqnı qızıştırma
▶️ Rus istilâcıları faal sürette işğal etilgen Qırımda arbiy cinayetçiler içün arsa ayırmağa devam etmekte. Böyle etip, işğalci akimiyet Aqyar şeerinde rus arbiy hadimleri içün 200-ge yaqın arsa azırlanğanı aqqında haber etti.
▶️ İşğalciler Ğarp siyasetçileriniñ Cenüp memleketlerini sözde “rusiyege qarşı ittifaqqa” celp ettirmege tırışqanları aqqında propaganda haberlerini tarqata.
İşğalci matbuat vastalarınıñ yayınları
Bu afta Qırımda işğalci memuriyetlerniñ “temsilcileri” tarafından halq ögünde açıq şekilde tarqatılğan rusiyeniñ propaganda añlavtuvları:
▶️ İşğalciler nevbetteki kere Ğarp memleketlerini qorquzdırmağa devam ete: “mesüliyetsiz siyasetçiler sıñırda balanslamağa tırışa, Ğarp memleketlerinde mesüliyetsiz elitalarnıñ deñişmesi ve bizim ğalebemiz bütün dünya içün bir fırsat yaratacaq”.
▶️ İşğalci akimiyetniñ sözde “temsilcisi” olimpiada komitetini terrorist devletniñ sportçularını yarışta iştirak etmesini istemegi içün “rusiye duşmanlığında” qabaatladı: “Halqara olimpiada komiteti olimpiada esaslarına hainlik etti, siyasiy intiqam ve Ğarpnen begenilmegen memleketlernen esaplaşuv aleti oldı. Aynı şekilde olar rus duşmanlığını da, sportçularımızğa, ruslarğa ve belaruslarğa duşmanlıq munasebetlerini da gizlemeyler”.
İçtimaiy ruh
▶️ Sudaq rayonunıñ Suvuq Sala qasabasında işğalciler mektepte oca olıp çalışqan bir qadınnı tuttı. Yerli sakin İnstagram saifesinde Ukraina temsillerini, bayrağını ve “Ukrainağa şan-şüret” şiarını paylaşqan. Qadınnı kamera ögünde afu soratqanlar ve işten çıqarğanlar.
▶️ İşğalciler daa bir Qırım sakinini yaqaladı. Aqay, içtimaiy ağlarda sanki “rus ordusını itibardan tüşürgen”, putin aqqında yaramay şeyler yazğan ve cenkke qarşı çıqqan eken. “Dava” materialları “mahkemege” yiberilgen.
▶️ İşğal etilgen Bağçasarayda içtimaiy ağlarda işğalci akimiyetni tenqit etken, Ukraina Silâlı quvetlerini desteklegen ve Ukraina topraq bütünligine qol tutqan yerli sakinni tutıp aldılar. Aqaynı kamerağa çekip, afu soratqanlar ve “dava” materiallarını “mahkemege” yollağanlar.
▶️ İşğalciler daa bir Aqmescit sakinini yaqaladı. O, içtimaiy ağlarnda lağap qullanıp, işğalcilerni ve işğalci memuriyetni yamanlağan, Ukraina topraq bütünligini desteklegen ve Ukraina Silâlı quvetlerini beklegenini bildirgen. Erkekni videoğa çekip, afu soratqanlar. “Materiallar” sözde “mahkemege” yiberilgen, al-azırda cinaiy “dava” açılması aqqında qarar çıqarılması beklene.
▶️ Yalta rayonunda işğalciler sözde “putin seçimlerinden” soñ yerli sakinlerge basqı kösterilmege devam ete. Böyle etip, işğal etilgen Simeizniñ işğalci “mahkemesi” bülletende Ukraina Silâlı quvetlerini beklegenini yazğan bir yerli sakinni mesüliyetke çekti.
▶️ İşğal etilgen Sudaqta işğalciler içtimaiy ağlarda rus ordusını ve putinni yamanlağan yazılar paylaşqan bir qadınnı tuttı. Qadınnıñ evinde keçken qanunsız tintüv vaqtında pek çoq ukrain bayraqları ve timsalâtı tapıldı.
▶️ İşğal etilgen Yaltada içtimaiy ağlarda işğalci memuriyetlerni ve işğalci ordunı yamanlağan yazılar paylaşqan bir qadınnı qanunsız şekilde tevqif ettiler. “Dava” materialları “mahkemege” yiberildi.
▶️ İşğal etilgen Aqmescitte içtimaiy ağlarda işğalcilerni ve putinni tenqit etip, ukrain timsalâtı ve yırlarını paylaşqanı, Ukraina Silâlı quvetlerine qol tutqanını bildirgeni içün bir yerli sakin 5 künge tevqif etilip, 30 biñ ruble cöreme töledi. Qadınnı kamera ögünde afu soramağa zorladılar.
▶️ İşğal altındaki Yalta rayonunıñ Partenit qasabasınıñ sakini, içtimaiy ağlarda Ukrainağa qoltutqan anonim saife alıp barğanı ve işğalcilerniñ cinayetlerini añlatqanı içün qanunsız olaraq tevqif etildi. İşğalciler erkekke 100 biñ rüble cöreme ve 10 kün apis cezası berdiler.
▶️ “Jovta striçka” (“Sarı şerit”) areketiniñ faalleri işğalcilerge qarşılığını köstermege devam etip, Qırımda işğalcilerniñ propaganda materiallarını yoq ete ve Ukrainanı desteklegen materiallarnı tarqatalar. Aynı zamanda, faaller qarşılıq areketine er kesniñ qoşula bilecek, mektüpler, vazifeler, grafiti örnekleri ve telükesizlik tevsiyeler ala bilecek çat-bot yarattı.
▶️ “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda işğalcilerniñ ve rus arbiy cinayetçilerniñ şahsiy malümatlarını bildirmege devam ete.
▶️ “Zla Mavka” (“Açuvlı Mavka”) qarşılıq areketiniñ faalleri “Qırım – Ukraina” olğanını ve işğalcilerniñ Qırımda istenilmegenini hatırlatqan “yañı” kupüralar ve vatanseverlik stikerleri tarqattı. Ondan da ğayrı, faaller kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete.
Ukrainağa şan-şüret!