Tünevin Daimiy Temsilci Almaniya Tışqı işler Naziri Tobias Lindnernen ve Federal Kantsler ofisi Merkeziy, Şarq, Cenüp Avropa, Cenübiy Kavkaz ve Merkeziy Asiya meselelerinden idare başı Aleksandr Vallau ile körüşüv ötkerdi.

Tamila Taşeva Almaniyanıñ Ukrainağa çeşit saalarda köstergen destekleri içün teşekkürlerini bildirip, bu destekniñ Ukrainanıñ ğalebesine qadar artacağına ümüt etkenini bildirdi.

“Ukraina içün ğarbiy ortaqlarımızdan arbiy destek al etici emiyet taşıy. Qara deñizde Ukraina Silâlı quvetleriniñ muvafaqiyetleri – daa bir isbat. Öz flotu olmadan, Ukraina ğarbiy silâ destegi yardımınen rusiye Qara deñiz flotunıñ üçte birini yoq etip oldı, bu da bürtükli koridornıñ çalışmasına imkan berdi. Bu da putinniñ “qırmızı sızıqları” – bu tek şantaj ve qorqutuvlar”, – dep qayd etti Daimiy Temsilci.

Bundan da ğayrı, taraflar işğal etilgen Qırımda soñki vaziyetni, tasil askeriyleştirüvini ve yaşlar arasında “cenk modası” propagandasını, işğal etilgen topraqlardan ukrain balalarınıñ rusiyege çıqarılması, Qırım yarımadasında insan aqlarınıñ bozuluvlarını müzakere etti.

Körüşüv çerçivesinde Qırım siyasiy mabüslerine, hususan jurnalistler, blogerler ve vatandaş jurnalistler içün mentorlıq programmalarına alman temsilcilerniñ qoşulmasınıñ müimligi, bu sene Qırım Platforması çerçivesinde müim tedbirler – ükümet ve parlament sammitleri aqqında qonuşmalar yapıldı. Almaniya Bundestagınıñ vitse-prezidenti Katrin Gering-Ekardnıñ mentorlıq Programmasına qoşulğanı ve onıñ Qırım Platformasında iştirak etkeni içün qanunsız şekilde mahküm etilgen Milliy Meclis reisiniñ birinci muavini Nariman Celâlnıñ mentorı olğanı qayd etildi.

Bunıñnen birlikte, Daimiy Temsilci eki memleketniñ tasil saasında işbirligi arta bilecegi, hususan sponsorlıq, öğdeki halqara üniversitetlerde ukrain tilini öğretüv ve Qırım studiyalarını yaratuv aqqında aytıp berdi.