“Serbest Qırımğa mektüpler” teşebbüsi çerçivesinde Daimiy Temsilci Tamila Taşeva Milliy Meclis reisiniñ birinci muavini Nariman Celâlnıñ mektübini oqudı. Faal, jurnalist, oca, siyasetşınas Nariman Celâl 2021 senesi Qırım Platformasında açılış sammitinde iştirak etkeni içün işğalci akimiyet tarafından mahküm etildi.

Narimannıñ sıması Qırım ve qırımtatar halqı içün pek müim, onıñ mahküm etilmesi – rus cinayetleriniñ daa bir delili. Rus rejiminiñ Milliy Meclis faaliyetini yasaqlamasına ve onıñ faaliyetini “ekstremizsitk” olaraq tanığanına, yarımada jurnalistlerini, hususan da qırımtatarlarnı taqip etmelerine baqmadan, Nariman işğalde, halqınıñ yanında yaşamağa, Qırımda işğlcilerniñ cinayetlerini açıqlamağa devam etti. O, Rusiye tarafından tutulğan ve mahküm etilgen qırımtatar faallerine destek kösterdi, işğalcilerniñ cinayetlerini, hususan da işğal şartlarında qırımtatar halqınıñ aqları bozulğanını añlattı, “Qırım birdemligi” toplaşuvlarında iştirak etti, halqara platformalarda Qırımnıñ işğalden qurtarılması kerekigi meselesini köterdi. İşğalcilerniñ cinayetleri aqqında açıq-açıq qonuşmağa ve Qırım Platformasında iştirak etüvden soñ Qırımğa qaytmağa cesareti, aqiqatı ve Ukrainağa sadıqlığı içün Milliy Meclis reisiniñ birinci muavini 17 yıl apis cezasında mahküm etildi ve 700 biñ ruble cöreme töledi.

Bugün Narimannıñ doğğan künü. O, 44 yaşına kire ve kene qorantası ve dostları yanında olmaycaq, çünki Rusiye onı ve yüzlerce semetdeşlerimizni bu fırsattan marum etti.

Mayısnıñ 19-na qadar Nariman Celâl ve qanunsız şekilde mahküm etilgen başqa siyasiy mabüslerge destek sözlerini yazmağa imkânıñız var.

“Serbest Qırımğa mektüpler” teşebbüsiniñ devam etkenini hatırlatamız. Bu teşebbüske qoşulıp, semetdeşlerimizge mektüp yazıp, mahküm etilgen, amma ağır şartlarğa, basqılarğa baqmadan ruhtan tüşmegen, evge qaytacağına ve Ukrainanıñ ğalebe qazanacağına inanğan vatandaşlarımızğa destek sözleriñizni ifade ete bilirsiñiz.

Qarşılıq devam ete!