Bugün iç kimse kibi sözniñ qıymetini, bu cenkte silânıñ qıymetini de bilgen mütehassıslar künüdir. Közleri aqiqatnı birincilerden körgen, ruh çağıruvı ise onı bütün dünyağa alıp barğan, işğal teşviqatı içün boşluqlarnı qapatqan mütehassıslar künü. Söz serbestligi olmağan yerde demokratiya öle, bunı olar — jurnalistler — eñ yahşı bileler. Şunıñ içün de işğalciler işğal etilgen Qırımda söz serbestligini birinciler sırasında yoq etip, bütün media resurslarını tolusınen totalitar idarege aldılar.

Em vatandaşlıq ayatında, em de cebe saflarındaki vaqialarnıñ daima şaatı olğan Jurnalist künü tek matbuat hadimleri içün şeref künü degil de, malümat küreşinde canlarını bergenlerni hatırlav künüdir, em de mustaqilligi, öz pozitsiyasını ifade etmesi içün esirge tüşkenlerni añuvdır. İşğal etilgen Qırımnıñ işğalci «idaresi» tarafından qorqutuvlarğa, taqiplerge ve, niayet, qanunsız apiske alınuv telükesine baqmadan, jurnalistler aqiqatnı, müim ukrayin tarafdarı ikâyelerni, ve küçlü manalarnı oquyıcılarğa yarımadadan, qalğan dünyadan, Ukrayinadan, qıtadan ketirmege devam eteler. Bu, tutulğan soñ da çalışmağa devam eteyatqan ve «Zenaatnıñ şerefi» mukâfatını alğan jurnalist, cemaat faali, aq-uquq qorçalayıcısı Lutfiye Zudiyevanıñ ikâyesidir.

Temsilcilik 2024 senesi iyün 4-ke Rusiye Federatsiyası 218 adamnı qanunsız apiske alğanını, olardan eñ azından 16-sı jurnalistler, vatandaş jurnalistleri ve blogerleri olğanını qayd etmekte. İşğal etilgen Qırımda insan aq-uquqları ve söz serbestligi bozuvlarını aydınlatqanları içün siyasiy mabüs olğanlardan bizge belli olğan adlarnı unutmamalımız: İrina Daniloviç, Osman Arifmemetov, Oleksiy Bessarabov, Timur İbragimov, Remzi Bekirov, Vilen Temeryanov, Marlen (Suleyman) Asanov, Nariman Celâl, Rustem Şeyhaliyev, Server Mustafayev, Vladislav Yesipenko, Amet Suleymanov, Asan Ahtemov, Ruslan Suleymanov, Seyran Saliyev ve Dmıtro Ştıblikov.

Yarımadanıñ media landşaftı aman-aman yoq etildi. Mustaqil matbuat vastalarını yoq etmek siyaseti qırımlılarnı alternativ malümat almaqtan marum ete, onıñ yerine teşviqat püsküri yaratmaqno közde tuta edi. 2022 senesi tam miqyaslı ücümden soñ işğal etilgen Qırımdan kerçek malümat almaq daa da ağırlaştı, qanuncılıqtaki deñişmeler vastasınen Rusiye Federatsiyası matbuatqa yapqan zulumını ep sadeleştirdi ve qanunsız olaraq sözde ekstremistler cedvellerini şekillendirmege devam etti.

Temsilcilik, haberleri agressor devletniñ, hususan, Qırım yarımadası territoriyasında yapılğan cenk cinayetlerini aydınlatqan er bir adamğa telüke şaraitlerinde ğayretli ve qorqusız çalışqanları içün minnetdarlığını bildire. İnanamız ki, tezden Qırımğa kene de söz serbestligi qaytacaq, ve memleketniñ çeşit köşelerindeki jurnalistler cemiyetimizniñ ve devletimizniñ ğalebeleri ve cesürliklerinen halqara meydanda serbest paylaşırlar.