Bugün, iyünniñ 17-nde, Avropa Birliginiñ Şurası Qırım Muhtar Cumhuriyeti ve Aqyar şeeriniñ rusiye tarafından işğal etilmesi sebebinden Avropa Birliginen kirsetilgen sanktsiyalarnı kelecek seneniñ iyün 23-ne qadar uzatuv aqqında qarar çıqardı.

Sanktsiyalar, ilk kere 2014 senesi iyün ayında kirsetilgen edi. Bu sanktsiyalarğa köre, işğal etilgen Qırımdan çıqarılğan mallarnı AB-ge ital etüv ve işğal etilgen Qırım MC ile Aqyar şeerine maddiy yatırımlar yasaq etile.

Bundan ğayrı, işğal etilgen Qırımda qayd etilgen şirketlerge bazı mallar ve tehnologiyalarnı ihrac etüv, işğal etilgen Qırımda naqliyat; telebağ ve energetika; neft, gaz ve mineral resurslar çıqaruv içün qullanılğan mallarnıñ ihraç etilmesi Avropa Birligi tarafından sıñırlandı.