Qırımtatar milliy bayraq künü münasebeti ile qırımtastar medeniyeti ve aşlarınıñ emiyetini qayd etmek içün Temsilcilikte yantıq master-klası keçirildi. Çünki yemekler qırımtatar medeniyetiniñ müim parçasıdır. Ünikal aşlar halqnıñ özgünligini köstermekten ğayrı, medeniy deñişüv ve qarşılıqlı zenginleşüv vazifesini becere.

“Musafir” restoranınıñ baş aşçısı tarafından ötkerilgen master-klasqa Daimiy Temsilci Tamila Taşeva, Ukrainada Büyük Britaniya Elçisi Martin Garris, Ukrainada Kanada Elçisi Natalka Tsmots, Ukrainada Felemenk işlerinden Vaqtınca temsilci Esselin van Erten, Ukrainada Finlandiya işlerinden Vaqtınca temsilci
Merya Lahtinen ve Ukraina institutınıñ müdir muavini Alim Aliyev qoşuldı.

Master-klas vaqtında iştirakçiler Ukraina tamır halqınıñ zengin medeniyeti aqqında bilgiler aldı, bir çoq sınavlardan keçken, şu cümleden 1944 senesi sürgün etilgen qırımtatar halqınıñ gastronomik müitine daldılar.

Diplomatlar ayrıca Ukrainanıñ topraq bütünligine qol tutuv müimligini ve bütün işğal etilgen topraqlarnıñ azat etilmesi kerekligini müzakere etti. Olar, bu meselelerniñ halqara telükesizlik, insan aqları ve özgünlikleriniñ ğayrıdan tiklenmesi içün ilk vazife olması kerekligini qayd etti.

Bu tedbir – Ukraina tamır halqı olğan qırımtatarlarnıñ medeniyetiniñ saqlanılması ve oña qol tutulması müimligini daa bir bildirmek içün bir vesile. Bugün-de-bugün qırımtatarlar ukrainlernen beraber devletimizniñ Mustaqilligi içün küreşe, işğalcilerge qarşılıq köstere, Ukrainanıñ azat etilmesi ve inkişaf etmesi içün ğayret köstermektedir.

Tedbir, Büyük Britaniya, Estoniya, Kanada, Felemenk, Amerika Qoşma Ştatları, Finlandiya, İsviçre ve İsveç devletleri tarafından desteklengen “Quvetli Ukraina içün Ortaqlıq” Fondunıñ desteginen ötkerildi.

Videoda Usein Bekirovnıñ bestesi qullanılmaqta.