Vaşingtonda ötkerilgen “Tasil ve ilimde Ukraina-Amerika ortaqlığı: beraberlikte quvet” konferentsiyası vaqtında Ukraina studiyalarınıñ global koalitsiyası başlanması aqqında ilân etildi. O, ukrainşınaslıqnı ögrenmege istegen bütün dünyadan alimler ve studentlerniñ tecribe, resurs ve ğayelernen deñişüvi içün, bütün mevcut ukrainşınaslıq teşebbüslerini birleştirmek kerek.

Konferentsiya vaqtında Olena Zelenska bütün iştirakçilerge, Ukraina aqqında bilgilerni tarqatmağa yardımcı olğan müessise ve teşkilâtlarğa teşekkür bildirdi.

“Elli yıl evelsi Garvard universitetiniñ Ukraina ilmiy institutı birinci oldı, ve uzun vaqıt devamında AQŞ-ta Ukraina tarihı ve medeniyetini ögrenüvi saasında yekâne akademik merkez olaraq qaldı. Amma soñra bir çoq Amerika universitetleri örnek alıp, ukrain kursları ve ukrainşınaslıq boyunca stipendiyalar yarattı. Amma olarnıñ arasında qırımtatar studiyaları olmasını da ister edim – Rusiyeniñ esirine alınğan ve şu vaqıtta anda repressiyağa oğratılğan Qırım halqınıñ eşqına”, — dep qayd etti birinci hanım.

Olena Zelenska ayrıca, al-azırda tek ukrain alimlerini ya da medeniyet erbaplarını bilmek degil de, Ukrainanı añlamaq, yani, aqiqatnıñ bizim tarafımızda olğanını daa yahşı añlamaq kerek olğanını da qayd etti.

Tedbir Ukraina Prezidenti Volodımır Zelenskıynıñ 75-nci NATO sammiti münasebeti ile AQŞ-qa resmiy ziyareti çerçivesinde olıp keçti.