Bugün ukrainliler içün müim bir kündir — Ukraina tarihında yañı saife açılğan ve devletimiz öz mustaqilligini qaytarğan künge 33 yıl oldı. Bu kün, öz toprağımızda serbest yaşamaq aqqı içün müim ğayret köstergen ve küreşken er birimiz aqqındadır.

Yıllar devamında memleketimiz keçken yol yengil degil edi, amma mustaqillik bizge öz taqdirimizni belgilemege, öz printsiplerimizge köre devletimizni qurmağa aq berdi. Bu kün mesüliet aqqında bir hatırlavdır — serbestlikni qazanmaq içün canlarını bergenlerge, ellerinde silânen onı qorçalamağa devam etkenlerge ve işğal etilgen topraqlarğa Ukraina bayrağınıñ qaytarılmasını beklegenlerge.

Böyleliknen, bu kün Qırım içün hususiydir, çünki mında mustaqillik künü mecburen rus işğali şaraitinde qayd etile. Qorqutuvlar ve basqı altında bile öz vatanına sadıq qalğanlarnıñ episini hatırlaymız. Qırım sakinleri mevcut vastalarnen işğalge qarşılıq köstermege devam eteler ve yarımadağa Ukraina bayrağınıñ qaytarılmasını bekleyler.

Rusiye tintüvler ve tintüvler yapıp, ukrain vatandaşlarını uydurılğan qabaatlavlarnen apiske atıp, cemaat basqısı keçrip, ukrain ruhunı qırmağa tırışa. Lâkin vatandaşlarımız qattı turıp, yarımadanın azat etilmesini bekleyler.

Cebede silânen duşman ücümlerinine qarşılıq berip, olarnı yoq etken, ğalebeni er kün yaqınlaştırğan ve ukrain topraqlarını azat etkenlernin yeri de pek müim. Ukraina ordusı, bizim qorçalayıcılarımız – bu Ukrainanıñ bugünki ve kelecegi içün küreşken, barışıq ve serbestlik içün eñ yüksek paynı bermege azır olğanlardır. Qıyınlıqlarğa baqmadan, qurşunlar ve patlavlarğa baqmadan, olar azat etilgen şeerlerniñ üstünde ukrain bayraqlarını kötereler, bir kün de bu insanlar Ukrain bayrağını Aqmescit, Aqyar ve Qırımnıñ er bir şeer ve qasabası üstünde de köterecekler.

Bu kün küreşte ve maqsatlarğa irişüvde birlikniñ müimligini de hatırlata. Aramızda vaqtınca olaraq sıñırlar olsa da, tuvğan toprağımızğa sevgi ve umumiy degerlikler bütün ukrainlerni birleştire. Ve tek birlik ve ortaq areketler Ukrainanıñ işğalcilerden qurtulmasına ve onıñ bütünligini tiklemege imkân berecek.

Mustaqillik künü hayırlı olsun!

Resimler: Nikita Titov