Bugün biz qanunsız olaraq 12 yılğa mahküm etilgen qırımtatar faali İzzet Abdullayevniñ ikâyesini ikâye etemiz.

Apisten evel yaşayışı

İzzet Abdullayev 22 oktâbr 1986 senesi Özbekistannıñ Taşkent vilâyetindeki Toytepa şeerinde sürgünlikte dünyağa keldi.

1994 senesi qorantasınen beraber Qırımğa qaytıp kele ve Cürçı rayonunıñ Devlet Ali köyünde yerleşe.

2004 senesi Aqmescitniñ professional-tehnik qurucılıq oquv yurtuna kire, bir yıldan soñ gaz-elektrik qaynaqçılığı boyunca diplom ala. Bundan soñ o, zenaatı boyunca çalışa, soñra ise araba parçaları satuv teşkilâtına işke kire, anda başta yükleyici olıp çalışa, soñra ise anbar müdiri olaraq tayin etile.

İşğalciler neler uydurıp çıqardı

2018 senesi İzzet Abdullayevni iş yerinden sözde “ekstremizmge qarşı küreş merkez”ine qaçırıla.

2019 senesi martnıñ 27-nde Aqmescit şeeriniñ Bavurçı ve Mamaq qasabalarında qırımtatarlarnıñ evlerinde keçirilgen kütleviy tintüvler vaqtında faal rusiye işğalci idaresi tarafından qanunsız tevqif etildi.

2022 senesi mayısnıñ 12-nde rostov-na-donu şeeri “mahkemesi” onı 12 yıl qattı rejimli cezahanege mahküm etti.

Ondan da ğayrı, mahkeme vaqtında qırımtatarnıñ terciman müracaatı da red etildi.

“Bizlerni, Ukraina vatandaşlarını, Qırım musulmanlarını tek siyasiy sebeplerden mahküm ettiler, dep aytacağımız künlerni bekleymiz. Cezağa kerçekten lâyıq olğanlar ise cezalanacaqlar”, – dep, qayd etti o, mahkeme oturışuvında.

İzzet Abdullayevniñ apiske atılmasınıñ kerçek sebebi ne?

Qırımda qırımtatar halqınıñ bir çoq temsilcileri kibi o, da öz dini, milleti ve baqışları sebebinden işğalci memuriyet tarafından taqiplerge oğratıldı.

İzzet 2016 senesi Qırım siyasiy mabusleriniñ balaları içün tedbirler, musulman bayramlarını teşkil etip başladı. O, “Qırım birdemligi” cemaat teşkilatınıñ faali edi ve siyasiy mabuslerge SİZOğa yemek ulaştırmaqtan ğayrı, siyasiy sebeplerden uydurılğan mahkeme oturışuvlarında da faal iştirak ete edi. Bundan da ğayrı, mabüs, vatandaşlarınıñ evlerinde qanunsız tintüvler keçirilgende, er vaqıt olarnıñ yanında bulunıp, olarğa destek kösterdi, işğalci devletniñ basqılarına qarşı tirenç sergilemege yardım etti.

İzzet Abdullayev şimdi qayda?

2023 senesi iyülniñ 2-nde İzzet Abdullayevni novoçerkassk SİZO-sından vladimir şeerine avuştırıldı, iyülniñ 15-nde ise rusiye federatsiyasınıñ ulyanovsk vilâyetindeki dimitrovgrad şeerindeki 1-nci apishanege ketirildi ve bugüngece anda buluna.

***

Materiallar Ukrainanıñ vaqtınca işğal etilgen topraqlarınıñ reintegratsiya meseleleri nazirliginen beraber #10yılQarşılıq malümat kampaniyası çerçivesinde azırlandı. Kampaniya Qırım işğaline qarşı qarşılıq kösterüv kününe bağışlanğan tedbirlerniñ bir qısmıdır.