Er kün işğal etilgen topraqlarda yaşağan semetdeşlerimiz yarımadanıñ azat etilecegine işançlarını ifadelep, rus işğalcilerine toqtamayıp qarşılıq köstermege devam ete.

Er aftalıq #qarşılıq_areketi rubrikamızda adetince Qırımda ukrainlerniñ cesür küreşi ve işğalcilerge qarşılığına dair haberlernen paylaşmağa devam etemiz.  

• Kefe sakini içtimaiy ağlarda işğalcilerniñ ve rus “prezidentiniñ” areketlerini tenqid etti. İşğalciler adamnı tevqif ettiler, işğalci “mahkeme” ise oña ceza olaraq cöreme belgiledi.
• Ermeni Bazar sakini içtimaiy ağlarda Ukraina Silâlı Quvetlerine qol tutqanını yazğanı içün, işğalciler qadınnı tevqif etip, protokol tizdiler ve materiallarnı işğalci “mahkemege” yolladılar.
• Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete. Hususan, faaller nevbetteki kere rus işbirlikçi talipovğa Ukraina vatandaşlarını taqip etkeni içün cezasız qalmaycağını hatırlattı. 
• Kezlev sakini içtimaiy ağlarda işğalcilerni tenqid etti. İşğalciler sakinni tefqif ettiler, işğalci “mahkeme” ise oña 40 biñ ruble cöreme ve üç künlik aps cezası belgiledi.
• Kefe sakini içtimaiy ağlarda Ukraina Silalı Quvetlerine qol tutqanı içün, işğalciler tarafından tevqif etiğldi, oña qarşı qanunsız “mahkeme”de cinaiy iş açıldı.
• “ATEŞ” qarşılıq areketiniñ faalleri işğalcilerniñ Aqyarda işğalcilerniñ arbiy obyektlerini tapıp, Yalta rayonınıñ Privitne köyünde istihbarat yaptılar, malümat Ukraina Havfsızlıq ve Mudafaa Quvetlerine berildi. Faaller işğalcilerniñ silâlı küçleriniñ askerlerini de celp eteler, olardan birisi Vovçansk yanında Rusiye ordusınıñ ğayıpları aqqında malümat berdi.
• “Jovta striçka” (“Sarı şerit”) areketiniñ faalleri işğalcilerge qarşılığını köstermege devam ​​etip, işğal altındaki Qırımda işğalcilerniñ propaganda materiallarını yoq ete ve Ukrainanı desteklegen materiallarnı tarqatalar. Aynı vaqıtta faaller, işğal etilgen topraqlarda yaşayışnıñ aqiqatları aqqında haber bermege devam eteler. Avgustnıñ 24-te Ukraina Mustaqillik künü munasebeti ile faaller Aqyar, Aqmescit, Yalta, Aluşta ve Simeiz şeerlerinde ukrain timsallerini tarqatıp, aktsiya keçirdiler. Hususan, Ukraina bayrağı Aqmescit suv anbarında dalğalandı.
• Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete. Hususan, faaller nevbetteki kere rus işbirlikçi talipovğa Ukraina vatandaşlarını taqip etkeni içün cezasız qalmaycağını hatırlattı.
• “Zla Mavka” (“Açuvlı Mavka”) qarşılıq areketiniñ faalleri kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege ve öz timsalâtını tarqatmağa devam ete. Böyle timsalât hususan Keriç, Aqmescit ve Aqyar şeerlerinde peyda oldı. Ukraina Mustaqilligi künü münasebetinen faaller rus rublesiniñ dizaynini deñiştirip, andan rus elementlerini çıqardılar, şimdi de bu paralarnı yarımadanıñ şeerlerinde tarqatalar. 

Qırımnıñ işğalci makemelerinde sözde “rus ordusını itibardan tüşürüv” maddesine köre yañı memuriy davalarnıñ açılması da yarımadadaki qarşılıqnıñ artışını köstere. Avgustnıñ 15-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 943 vaqia qayd etildi. Olar arasında 836 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 20 adise alâ daa baqıla.

Cınısqa köre qadınlarğa qarşı 354 (42%), erkeklerge qarşı ise 481 (58%) qarar çıqarıldı. Umumen, berilgen cöremelerniñ umumiy miqdarı endi eñ azdan 26,4 million rus rublesini teşkil ete.

Cesürligiñiz ve vatanperverligiñiz içün sağ oluñız! Qırım – bu Ukraina, ve biz Qırım yarımadasınıñ eñ yaqın zamanda Ukraina terkibine qaytarılması, vaqtınca işğal etilgen topraqlarda yaşağan vatandaşlarımızğa ise havfsızlıq duyğusını temin etmek içün ep birlikte ğayret etemiz.

Ukrainağa şan-şüret!