Bugün biz qanunsız sürette qattı rejimli koloniyada 12 yılğa mahküm etilgen qırımtatar faali Mecit Abdurahmanovnıñ ikâyesinen paylaşmaq isteymiz. 

Apisten evelki yaşayışı

Mecit Abdurahmanov 1975 senesi fevralniñ 2-nde Özbekistannıñ Nijnoçirçik rayonınıñ Nove Jittâ köyünde doğdı, onıñ qorantası mında 1944 senesi Qırımdan sürgün etilgen edi.

1982 senesi Taşkent şeerindeki Sergeli rayonınıñ 6-ncı mektebiniñ birinci sınıfında oqumağa başladı. 9-ncı sınıfnı bitirgen soñ, “Gaz ve elektrik qaynaqçı“ zenaatını almaq içün tasil yurtuna oqumağa kire. Oquşnı bitirgen soñ, çoq vaqıt devamında zenaatı boyunca çalışmadı. Başta basmahanede, soñra ağaç işleme tükânında çalıştı.

2007 senesi siyasiy mabus qorantasınen Qırımğa qaytıp keldi, apiske alınmadan evel Aqmescit rayonınıñ Stroganovka köyünde yaşay edi. Qurucılıqta çalıştı, pencere ve qapı montajınen oğraştı.

İşğalciler neler uydurıp çıqardı?

2019 senesi martnıñ 27-nde Aqmescitniñ Kamenka ve Stroganivka qasabalarında ötkerilgen kütleviy tintüvlerden soñ, Mecit ve onlarnen diger qırımtatarı işğlaciler tarafında tutıp alındı ve esassız qabaatlavlarnen tevqif etildiler.

2022 senesi mayısnıñ 12-nde rostov-na-donu “mahkemesi“ Mecit Abdurahmanovnı 12 yılğa mahküm etti.

Mecit Abdurahmanovnıñ apiske atılmasınıñ kerçek sebebi ne?

Bir çoq başqa qırımtatarı kibi, Mecit Abdurahmanov da öz halqınıñ taqdirine, işğalci idaresi tarafından etnik sebeplerden qırımtatarlarnıñ qanunsız taqip etilmesine lâqayd qalıp olamadı. O, “Qırım birdemligi“niñ faali olıp, mahkemelerge, tintüvlerge daima qoşula, tek kişilik narazılıq aktsiyalarına çıqa edi, bunıñ içün 10 biñ ruble cöreme ve 5 künlük memuriy apis cezası alğan edi.

Mecit Abdurahmanov şimdi qayda?

2023 senesi iyül ayından başlap, Mecit Abdurahmanov Qırımdan aman-aman 1000 km uzaqlıqtaki saratov vilâyetiniñ balaşov şeerindeki T-0 apshanesinde tutulğanı belli oldı.

Onıñ sağlığı fenalaşmağa devam ete. Onıñ aşqazan ve içek ülseri, arqa diskleriniñ çıqması, bel agrısı ve başqa hronik hastalıqları bar. Rusiyeniñ SİZO şaraitinde onıñ başı sıq-sıq ağıra, tişleri çürümege başladı. Tutuluv şaraitleri soñ derece ağır olğanından, işğalci idaresi oña kerekli tibbiy yaradım köstermekni red etmekte.

2024 senesi avgustnıñ 28-nde rusiye federatsiyasınıñ “yuqarı mahkemesi“ birinci instantsiyanıñ qararı ve apellâtsiya mahkemesi qararına qarşı temyiz arizasını qabul etmeyip, siyasiy mabusniñ cezasını deñiştirmedi.