Vaqtınca işğal etilgen Qırımnıñ sakinleri yarımadanıñ azat etilecegine ve Ukrayinanıñ kelecegine işançlarından vazgeçmeyip, rus işğalcilerine qarşılıq köstermege devam eteler.

Qırım sakinleri arasında cemaat baqışları ve rus teşviqatınıñ añlatuvlarını yoq etken insanlar aqqında #qarşılıq_areketi rubrikamızda sizni haberdar etmege devam etemiz.

Rusiye Qırım sakinlerini ukrayin tarafdarı olğan pozitsiyası ve ukrayin ile qırımtatar menliginiñ kösterilmesi içün taqip etmege devam ete. İnsanlarnıñ qarşılığını ve işğalni qabul etmege istemegenlerini bastırmaq içün rf daa 2022 senesi cinaiy ve memuriy kodekslerge “rusiye federatsiyasınıñ silâlı küçlerini itibardan tüşürüv“ içün mesülietni közde tutqan deñişmeler qabul etti. Soñki vaqıtlarda olıp keçken böyle vaqialar buña misaldir:

• Keriç sakini içtimaiy ağlarda rusiyeni Ukrayinağa qarşı agressiyada qabaatlağan. İşğalciler qadınnı tutıp, videoda afu soramağa mecbur ettiler, protokol tizip, materiallarnı qanunsız “mahkemege” yolladılar.
• Qurman rayonınıñ Çernove köyüniñ sakini yerli tükânda işğalcilerni tenqid etken, hususan, işğalciler tarihiy olaraq qırımtatarlarğa ait olğan topraqta yaşağanlarını qayd etken, ruslarğa nisbeten aşalayıcı til qullanğan. İşğalciler qadınnı tutıp, videoda afu soramağa mecbur ettiler, protokol tizdiler ve materiallarnı qanunsız “mahkemege” yolladılar.
• Qırım sakini içtimaiy ağlarda ukrayin yırlarınıñ pleylist yaratqan. İşğalciler qadınnı tutıp, videoda afu soramağa mecbur ettiler, protokol tizdiler ve materiallarnı sözde “mahkemege” yolladılar.

2022 senesi rusiyeniñ Ukrayinağa qarşı tam miqyaslı ücüminden soñ küç alğan teşkilâtlı qarşılıq areketleri de er kün işğalcilerge qarşı tirenüc köstermege devam eteler:

• “ATEŞ“ qarşılıq kösterüv areketiniñ faalleri işğalcilerniñ arbiy obyektlerini, hususan, Qırımnıñ ğarbiy yalısındaki istihkamlarnıñ teşkerüvini devam eteler. Olarnıñ malümatına köre, işğalciler ukrayin yerastısınıñ vekillerini tapmaq içün maşinalarnı çoqça toqtatıp, yük bölüklerini ve şahsiy şeylerni diqqatnen teşkereler.
• “Jovta Striçka“ areketiniñ faalleri Qırımda işğalcilerge qarşılıq köstermege devam eteler, teşviqat materiallarınıñ kopiyalarını yoq eteler ve yarımadanıñ işğal etilgen şeerlerinde, hususan Aqmescit, Aqyar, Yalta ve Kezlevde vatanperverlik timsallerini tarqatalar. Faaller işğalciler Qırımda ruslarnı desteklemegen sakinlerinden işleriniñ alınğanları aqqında da haber eteler.
• “Krımski boyovi çaykı” (“Qırımnıñ cenkâver çağalaları”) faalleri areketiniñ faalleri vaqtınca işğal etilgen Qırımdaki satqınlarnı ve rusiye cenk cinayetçileri aqqında malümatnı sistemalı sürette toplap, neşir etmege devam eteler.
• “Zla Mavka” qarşılıq areketi öz kündeliklerini alıp barmağa, işğalcilerniñ cinayetlerini aydınlatqan aftalıq mecmuanı ve Aqmescit, Aqyar, Aluşta ile Keriçte Ukrayina destekli yarlıqlarnı tarqatmağa devam ete.

İnsaniyetsiz apis şartlarında bile işğalci rejimge qarşı tirenmege devam etken siyasiy mabusler aqqında da unutmamalımız.

• Rusiye tarafından qanunsız mahküm etilgen, rusiyeniñ krasnoyarsk vilâyetindeki yeniseysk apishanesinde tutulğan qırımtatar vatandaş jurnalist Rustem Şeyhaliyevniñ qan basımı daima yüksek olğanı ve baş ağrısından yamağanı haber etilmekte.
• Rusiye tarafından qanunsız mahküm etilgen qırımtatarı Rustem Seythalilov rusiyeniñ kareliya cumhuriyetindeki petrozavodsk şeeriniñ 9-ncı sanlı tüzetiş müessisesine avuştırılğanı belli oldı. Alınğan malümatqa köre, onı anda ketirilgen soñ belli olmağan sebeplerden dolayı deral 14 künge ceza koloniyasına yerleştirdiler.
• Rusiye tarafından qanunsız mahküm etilgen Qırımlı uquqqorçalayıcısı ve vatandaş jurnalisti İrina Daniloviç daima yürek ve baş ağrılarından şikâyet ete. O, orta ötitten soñ sol qulağında eşitüv qabiliyetini coydı, em de mikroinsulttan soñ bedeniniñ sol tarafı sançılğanından şikâyetlene. Daniloviçke kerekli tibbiy yardım kösterilmey.

Qırımnıñ işğal mahkemelerinde sözde “rf silâlı quvetlerini itibardan tüşürüv“ aqqında madde boyunca artqan yañı qanunsız memuriy davalar da qarşılıqnıñ quvetleşkenini tasdıqlay. 2024 senesi sentabrniñ 2o-ne qadar rusiye federatsiyası memuriy uquq bozuvları kodeksiniñ 20.3.3 maddesine köre tizilgen ve vaqtınca işğal etilgen Qırımdaki sözde “mahkemelerge” ve başqa vekâletli organlarğa yollanılğan 979 vaqia qayd etildi.  875 adisede qararlar çıqarıldı, 17 dava daa devam etmekte.

Cınısqa köre qadınlarğa qarşı 377 (43%), erkeklerge qarşı ise 497 (57%) qarar çıqarıldı. Episi olıp, çıqarılğan cöremelerniñ umumiy miqdarı endi eñ azından 26,4 million rus rublesini teşkil etmekte.

Cesaret ve açıq vatandaşlıq pozitsiyasını köstermege qorqmağan er keske teşekkürler bildiremiz. Qırım – bu Ukrayina, ve biz Qırım yarımadasını tez vaqıtta ukrayin nezareti altına qaytarmaq içün, vaqtınca işğal etilgen topraqlardan kelgen vatandaşlarımızğa ise telükesizlik duyğusı bermek içün elimizden kelgenini yapamız.

Ukrayinağa şan şerefler olsun!