Bugün biz qanunsız olaraq 14 yılğa mahküm etilgen qırımtatar vatandaş jurnalist Rustem Şeyhaliyevniñ ikâyesini aydınlatamız.
Apisten evelki yaşayışı
Rustem Şeyhaliyev 1979 senesi iyün 22-de Özbekistannıñ Samarqand şeerinde doğdı, onıñ qorantası anda 1944 senesi diger qırımtatarlarnen beraber sovet totalitar rejimi tarafından qanunsız sürgün etilge edi. Onıñ balalığı ve yaşlığı çoq balalı qorantada keçti, üç bala arasında o, üyken edi.
14 yaşında olğanda, Rustem qorantasınen Qırımğa qaytıp kele ve oquvını Aqmescit şeeriniñ 1-nci orta mektebinde devam ete. Mektepten soñ “elektrikçi ve gaz qaynakçısı” ihtisaslı zenaat oquv yurtuna oqumağa kire. Soñ bazarda çalışa.
İşğalciler neler uydurıp çıqardı
2019 senesi martnıñ 27-nde işğalciler Aqmescitniñ Kamenka ve Stroganivka qasabalarında qırımtatarlarnıñ evlerinde kene kütleviy tintüv keçirdiler. Bu tintüvler işğal ve rus tecavuzı başlanğanından berli eñ büyüklerinden biri oldı. O künü 25 adam, şu cümleden Rustem Şeyhaliyev tutıp alındı.
2022 senesi noyabrniñ 24-nde rostov-na-donu şeerindeki rus mahkemesi Rustemni terrorizm aqqında uydurılğan qabaatlavlar boyunca 14 yılğa mahküm etti.
Rustem Şeyhaliyevniñ mahküm etilmesiniñ kerçek sebebi
Rustem Şeyhaliyev cemaat arasında pek edi — o, balalar bayramlarını teşkil etmege yardım ete, muhtaclarğa aşayt malları satın ala, siyasiy mabuslerniñ qorantalarına yardım ete edi, husan da ‘’Qırım birdemligi‘’ areketiniñ faali edi.
2015 senesi vatandaş jurnalist olıp, Qırımda Rusiye tarafından musulmanlarğa qarşı yapılğan repressiya ve taqiplerni aydınlata edi.
Onıñ tutulması işğalcilerniñ uydurma qabaatlavlar vastasınen er angi razı olmayuvnı bastırmaqqa yönelgen repressiya siyasetiniñ bir qısmı edi.
Rustem Şeyhaliyev şimdi qayda?
2024 senesi fevral 1 künü moskva vilâyetiniñ vlasiha şeeriniñ mahkemesi siyasiy mabüsniñ temyiz arizasını red etip, qanunsız cezanı amelde qaldırdı.
2024 senesi martnıñ 18-nde Rustem Şeyhaliyev ve diger siyasiy mabusler SİZO-dan çıqarıldı, aprel ayında ise onı rusiyeniñ krasnoyarsk bölgesi yeniseysk şeerindeki 2-nci sanlı apishanege avuştırğanları belli oldı.
Apishanede qırımtatarnıñ sağlığı ket-kete fenalaşmağa devam ete, amma oña kerekli tibbiy yardım ve yürek baqıluvı yasaq etile. Bundan ğayrı, o, çoq arıqladı, ağır varikozdan çekişe.
“Rustem qan basımı ölçegende, tıp hadimleri aletni kerekli yükseklikke ketirmegenini, ve böyleliknen, o, normal sayılğan seviyeni köstergenini ayttı”, — dedi siyasiy mabüsniñ advokatı Lilâ Gemeci.