İşğalciler sözde “mahkeme” qararınen Qırımnıñ Aqmescit rayonında islâm mektebini qapattılar. Mektep sözde “Qırım ve Aqyar musulmanlarınıñ diniy idaresi”nden mustaqil olaraq faaliyet köstere edi. Qapatuvnıñ resmiy sebebi, sözde “habaşizm mefküresiniñ teşviqatı” olğanı iddia etile.

İşğalci memuriyetiniñ bu areketleri diniy ve etnik sebeplerden taqip siyasetiniñ bir qısmıdır. 2014 senesi Qırımda çalışqan 2220 diniy teşkilâttan 2024 senesi yanvar ayına qadar tek 932’si faal qaldı.Böyle azaluv rusiye qanunlarınıñ qanunsız kirsetilmesi,diniy liderlerge sistemalı basqı,  işbirlik yapmaqnı red etken diniy cemiyetlerniñ taqip etilmesiniñ neticesidir.

Qırım müftisi Emirali Ablayevge basqı kösterilmesi ve havfsızlıq küçleriniñ destegi ile yaratılğan ve Kremlniñ nezareti altında olğan müftilik vastasınen ayrıca basqı yapıla. Bu qurulış işğalci “uquq qorçalav organlarınen” işbirlikte Qırımdaki episi camilerniñ faaliyetini işğalci memuriyetniñ tesiri altına almağa tırışa. İşğalcilerge qol tutmağa istemegen mustaqil musulman cemiyetleri ve nufuzlı din erbapları diniy ve siyasiy sebeplerden taqiplerge oğratıla.

Kreml nezaretindeki diniy idaresiniñ malümatına köre, 2023 seneniñ başında Qırımda olarnıñ nezareti altında olmağan tek 10 cami qalğan. Sözde “müfti muavini” Ayder İsmailov açıq-açıq olarnıñ yoq etilmesi işğalcilerniñ “uquq qorçalav organları” yardımınen alıp barılğanını bildirdi.

Qırımtatarlar, Ukrainanıñ tamır halqı olaraq, tarihqa baqqanda Moskvağa iç boysunmağanları içün, sistematik olaraq repressiyalarğa oğraylar. Ukraina Prezidentiniñ Qırım Muhtar Cumhuriyetindeki Temsilciliginiñ malümatına köre, tek 2024 seneniñ yanvar ayında diniy sebeplerden 100-den ziyade qırımtatarnıñ taqip etüv vaqiası qayd etildi.

Aqmescit rayonında islâm mektebiniñ qapatılğanı ve mustaqil diniy cemiyetlerge qarşı repressiyalar alıp barılğanı işğalcilerniñ qırımtatarlarnıñ diniy ve milliy menligini yoq etmege, vaqtınca işğal etilgen topraqlarda din serbestligini ve insan aqlarını sıñırlamağa tırışqanınıñ daa bir köstergiçidir.