Aprelniñ 23-nde RF-niñ Ukrainağa qarşı silâlı tecavuzı köntekstinde milliy azlıqlar ve tamır halqlarnıñ aqlarına riayet etüv boyunca Ombudsmenniñ Mahsus esabatınıñ tevsiyeleri yerine ketirilmesiniñ neticeleri taqdim etildi. Tedbirde devlet akimiyeti, halqara teşkilâtlar, vatandaş cemiyetiniñ vekilleri iştirak ettiler. Temsilcilik faaliyetiniñ neticelerini Daimiy Temsilciniñ muavini Denıs Çıstikov taqdim etti.
Öz çıqışı vaqtında Denıs Çıstikov vaqtınca işğal etilgen Qırımdaki vaziyetke ayrı diqqat ayırdı:
“2024-2025 seneleri keçirilgen monitoringniñ neticelerine esaslanıp, bu sene Rusiye Federatsiyası tarafından keñ ölçüli qanun bozuvları devam etecegini tahmin ete bilemiz – hususan, qırımtatarlar toplu yaşağan yerlerde filtratsiya tedbirleri, şu cümleden rus quvetçileriniñ oqutuvları altında yerli yolbaşçılarnıñ yoq oluvları, soñra bu insanlarnıñ rusiye apishanelerinde peyda oluvı, siyasiy sebeplerden ibaret olğan işler boyunca Ukraina vatandaşlarını qorçalağan advokatlarnıñ litsenziyalarını lâğu etüv, böyleliknen de qorçalanuv aqqını ep sıñırlav, esirlerge tibbiy yardım kösterilmemesi. Ceza yerleri olaraq Qırımdan 2000 km uzaqlıqta olğan apishanelerniñ seçilmesi.
RF Ukrainanıñ vaqtınca işğal etilgen territoriyalarında yaşlarnen teşviqat işini vesiqalaştıruvğa ayrıca diqqat ayırmaq kerek – buña rekord paralar ayırıla”.
Bundan ğayrı, Denis Çıstikov insan aqları vaziyetini közetüvge sistemalı yanaşuvnıñ müimligini qayd etti ve olarnı devlet organları, cemaat teşkilâtları, halqara gumanitar missiyalarnıñ işinde semereli qullanmaq içün yañı yönelişlerni tapmaq kerekligini qayd etti:
“Temsilcilik er kün monitoring keçire, onı er afta Prezident ofisine, devlet organlarına, bir sıra elçiliklerge yollaylar. Bu sene biz milliy azlıqlarnıñ cemaat teşkilâtlarınen de bağ qurdıq, olarğa vaqtınca işğal etilgen Qırımda insan aqları bozuvlarınıñ vaziyeti aqqında ayrıca monitoring malümatını beremiz, bu malümat kelecekte halqara ortaqlarımıznen bildirişüv vaqtında Rusiye Federatsiyası tarafından yapılğan cinayetlerniñ kölemini köstermek içün qullanılacaq”, — dep, qayd etti Daimiy Temsilciniñ muavini.
Denıs Çıstikov ayrıca tamır halqlarğa, hususan qırımtatarlarğa, qaraimlerge, qırımçaqlarğa yardım etüv saasında Temsilcilik işiniñ esas yönelişlerini qayd etti:
“Biz qırımtatar halqı Meclisi ile işbirlik alıp baramız, al-azırda qırımtatar halqınıñ sürgünlik kününe tedbirler azırlaymız, em de qırımtatar tili boyunca milliy komissiyanı tiklev boyunca çalışmalar alıp baramız. Yaqın kelecekte qaraimler ve qırımçaqlarnen körüşüv planlaştırıla, biz tek milliy teşkilatlarnı degil de, bu halqlarnıñ inkişafınıñ köçüricisi ola bilecek yağlarnı celp etecekmiz.”
Temsilcilik milliy azlıqlar ve tamır halqlarnıñ aqlarını qorçalav saasında faaliyetini devam etip, bu yönelişte yapılğan aq-uquq bozuvlarını qayd etecek, ortaq devletlerge, halqara gumanitar ve insan aqları missiyalarına olarnıñ kölemi ve neticeleri aqqında haber etecek. Bundan da ğayrı, devlet organları, cemaat teşkilâtları, tış gumanitar ve uquqqorçalayıcı qurulışlarnen beraber vaqtınca işğal etilgen topraqlarda yaşağan semetdeşlerimizge yardım köstermek içün algoritmler keliştirecek
Fotoresimler: Ukraina Ombudsmeni Ofisi